tum se katra ke nikalne ka sabab hai koi

tum se katrā ke nikalne kā sabab hai koī

mil ke tum se

baḌī tanhā.ī sī ho jaatī hai

ghar talak saath

ik aahaT sī chalī aatī hai

sab kivāḌoñ ko irādoñ ko

muqaffal kar lo

par ye aahaT hai ki

dīvāroñ se chhan aatī hai

ḳhaak uḌā kartī hai

jis sahn meñ sannāTe kī

vaañ ajab shauq kā darbār lagā hotā hai

raqs kartī hai mire paañv tale

merī zamīñ

hosh kī bazm meñ

mai-ḳhāna sajā hotā hai

qufl saare mire ehsās ke

sab zanjīreñ

naam lete haiñ kabhī jaam ko Takrāte haiñ

ḳhvāb mere

mujhe samjhāne chale aate haiñ

do ghaḌī meñ mirā har kaam ulaT jaatā hai

is qadar shor machāte haiñ

ye lamhāt-e-tarab

dhyān pallū se bañdhī

soch se haT jaatā hai

ḳhud ko tartīb se rakhne meñ uThāne meñ mujhe

mil ke har baar

baḌā vaqt bhī lag jaatā hai

tum se rishta to koī thā

na hī ab hai koī

tum se katrā ke nikalne kā sabab hai koī

tum se katra ke nikalne ka sabab hai koi

mil ke tum se

baDi tanhai si ho jati hai

ghar talak sath

ek aahaT si chali aati hai

sab kiwaDon ko iradon ko

muqaffal kar lo

par ye aahaT hai ki

diwaron se chhan aati hai

KHak uDa karti hai

jis sahn mein sannaTe ki

wan ajab shauq ka darbar laga hota hai

raqs karti hai mere panw tale

meri zamin

hosh ki bazm mein

mai-KHana saja hota hai

qufl sare mere ehsas ke

sab zanjiren

nam lete hain kabhi jam ko Takraate hain

KHwab mere

mujhe samjhane chale aate hain

do ghaDi mein mera har kaam ulaT jata hai

is qadar shor machate hain

ye lamhat-e-tarab

dhyan pallu se bandhi

soch se haT jata hai

KHud ko tartib se rakhne mein uThane mein mujhe

mil ke har bar

baDa waqt bhi lag jata hai

tum se rishta to koi tha

na hi ab hai koi

tum se katra ke nikalne ka sabab hai koi