tumhaara aastan malum hoti hai

kabhī rāhat kabhī āzār-e-jāñ ma.alūm hotī hai

mohabbat ek paiham imtihāñ ma.alūm hotī hai

jo tum rūThe bahār-e-zindagī bhī phir ga.ī mujh se

naved-e-gul bhī paiġhām-e-ḳhizāñ ma.alūm hotī hai

fareb-e-ārzū ne kar diyā gum-gashta-e-manzil

ki gard-e-rāh bhī sang-e-nishāñ ma.alūm hotī hai

sar-e-sajda jhukāyā is qadar shauq-e-ibādat ne

jabīñ merī tumhārā āstāñ ma.alūm hotī hai

kuchh aise bas ga.e ho dil meñ āñkhoñ meñ tasavvur meñ

ki do qālib haiñ lekin ek jaañ ma.alūm hotī hai

kabhī rūh-e-tarab raqsāñ nazar aatī thī kāñToñ meñ

nashāt-e-gul bhī ab āzār-e-jāñ ma.alūm hotī hai

na chheḌ ai ham-nashīñ itnā alam-añgez afsāna

ki suntā huuñ to apnī dāstāñ ma.alūm hotī hai

kabhi rahat kabhi aazar-e-jaan malum hoti hai

mohabbat ek paiham imtihan malum hoti hai

jo tum ruThe bahaar-e-zindagi bhi phir gai mujh se

nawed-e-gul bhi paigham-e-KHizan malum hoti hai

fareb-e-arzu ne kar diya gum-gashta-e-manzil

ki gard-e-rah bhi sang-e-nishan malum hoti hai

sar-e-sajda jhukaya is qadar shauq-e-ibaadat ne

jabin meri tumhaara aastan malum hoti hai

kuchh aise bas gae ho dil mein aankhon mein tasawwur mein

ki do qalib hain lekin ek jaan malum hoti hai

kabhi ruh-e-tarab raqsan nazar aati thi kanTon mein

nashat-e-gul bhi ab aazar-e-jaan malum hoti hai

na chheD ai ham-nashin itna alam-angez afsana

ki sunta hun to apni dastan malum hoti hai