tumhaare baad ka mausam

tumhāre baad kā mausam

tumhāre saath ke mausam se kitnā muḳhtalif Thahrā

agarche raah meñ merī faqat kāñTe hī kāñTe the

mire dukh tum ne bāñTe the

ye sab kuchh Thiik jaisā thā

maiñ tum se duur thā lekin bahut nazdīk jaisā thā

magar dil ko tasallī thī ki āḳhir mil hī jā.eñge

hamārī hasratoñ ke phuul ik din khil hī jā.eñge

tum aksar mujh se kahtī thiiñ

tumhāre qurb ke lamhe mujhe masrūr kar deñge

añdherā hī añdherā huuñ sarāpā nuur kar deñge

magar ye ho nahīñ paayā

so phir kuchh is tarah bikhrā mirī ḳhushiyoñ kā sarmāya

sidhāre us jahāñ ko tum

jahāñ se aaj tak koī na aaya hai na aa.egā

magar jab koī bhī email aatā hai

koī bhī phone kī ghanTī achānak jab bhī bajtī hai

to us āvāz aur harfoñ se jo tasvīr bantī hai

tumhārī jaisī hotī hai

magar vo tum nahīñ hotīñ

tumhaare baad ka mausam

tumhaare sath ke mausam se kitna muKHtalif Thahra

agarche rah mein meri faqat kanTe hi kanTe the

mere dukh tum ne banTe the

ye sab kuchh Thik jaisa tha

main tum se dur tha lekin bahut nazdik jaisa tha

magar dil ko tasalli thi ki aaKHir mil hi jaenge

hamari hasraton ke phul ek din khil hi jaenge

tum aksar mujh se kahti thin

tumhaare qurb ke lamhe mujhe masrur kar denge

andhera hi andhera hun sarapa nur kar denge

magar ye ho nahin paya

so phir kuchh is tarah bikhra meri KHushiyon ka sarmaya

sidhaare us jahan ko tum

jahan se aaj tak koi na aaya hai na aaega

magar jab koi bhi email aata hai

koi bhi phone ki ghanTi achanak jab bhi bajti hai

to us aawaz aur harfon se jo taswir banti hai

tumhaari jaisi hoti hai

magar wo tum nahin hotin