tumhaare baad

tumhāre ba.ad ajab kashmakash meñ rahtī huuñ

maiñ kyā batā.ūñ ke jo talḳhiyāñ maiñ sahtī huuñ

nizām-e-zindagī badlā huā sā lagtā hai

ki lamha lamha mujhe ba-duā sā lagtā hai

vo log jin ke liye maiñ kabhī mubārak thī

ab un ke vāste maiñ ek fel-e-bad jaisī

ke ḳhud pe bhī mujhe kuchh haq nahīñ rahā jaise

hañsī-ḳhushī kā zamāna bichhaḌ gayā jaise

akelā-pan bhī hiqārat se dekhtā hai mujhe

jise bhī dekhiye hairat se dekhtā hai mujhe

kī jaise haq hī nahīñ koī mujh ko jiine kā

kisī ko zaḳhm nahīñ dikh rahā hai siine kā

mire vajūd meñ tanhā.ī kaisī gūñjī hai

udāsiyāñ hī tire ba.ad merī pūñjī hai

ye merī bevgī koī gunāh ho jaise

har ik nigāh mujhe dekhtī hai ab aise

ke jaise haath meñ mere mirā muqaddar thā

vo sāneha bhī koī jaise jurm thā merā

kyā merā naata bhī koī samāj se na rahā

kyā merā vāsta rasm-o-rivāj se na rahā

mirā vajūd hī ḳhud mujh pe tanz kartā hai

ye merā saaya bhī kyuuñ aaj mujh se Dartā hai

mirā har apnā bhī manhūs kah rahā hai mujhe

mire is haal kā shāyad hī kuchh pata ho tujhe

tumhaare baad ajab kashmakash mein rahti hun

main kya bataun ke jo talKHiyan main sahti hun

nizam-e-zindagi badla hua sa lagta hai

ki lamha lamha mujhe ba-dua sa lagta hai

wo log jin ke liye main kabhi mubarak thi

ab un ke waste main ek fel-e-bad jaisi

ke KHud pe bhi mujhe kuchh haq nahin raha jaise

hansi-KHushi ka zamana bichhaD gaya jaise

akela-pan bhi hiqarat se dekhta hai mujhe

jise bhi dekhiye hairat se dekhta hai mujhe

ki jaise haq hi nahin koi mujh ko jine ka

kisi ko zaKHm nahin dikh raha hai sine ka

mere wajud mein tanhai kaisi gunji hai

udasiyan hi tere baad meri punji hai

ye meri bewgi koi gunah ho jaise

har ek nigah mujhe dekhti hai ab aise

ke jaise hath mein mere mera muqaddar tha

wo saneha bhi koi jaise jurm tha mera

kya mera nata bhi koi samaj se na raha

kya mera wasta rasm-o-riwaj se na raha

mera wajud hi KHud mujh pe tanz karta hai

ye mera saya bhi kyun aaj mujh se Darta hai

mera har apna bhi manhus kah raha hai mujhe

mere is haal ka shayad hi kuchh pata ho tujhe