tumhaare baghair

ye māh-o-sāl kī gardish ye merī tanhā.ī

ye zindagī kā safar aur ye ābla-pā.ī

bahut hasīñ hai ye manzar magar tumhāre baġhair

mire vajūd pe har dam hai murdanī chhā.ī

agarche aam hai fitrat kā husn har jānib

mire liye to kashish is meñ hai na zebā.ī

ye kā.enāt-o-kavākib ye kahkashāñ ye shahāb

zamīn kā ye tasalsul falak kī pahnā.ī

bulandī koh kī sahrā kī be-karāñ vus.at

nadī kā shor ho yā bahr kī ho gahrā.ī

nasheb-e-koh meñ sabze kā maḳhmalīñ bistar

shafaq kā surḳh libāda guloñ kī ra.anā.ī

javār-e-sahn-e-gulistāñ meñ āhuoñ kā ḳhirām

chaman meñ shoḳh anādil kī naġhma-ārā.ī

shah-e-nujūm kī aamad kī dil-pazīr ḳhabar

nasīm-e-sub.h galī kūchoñ meñ sunā aa.ī

kiran kā phūTnā mashriq se bā-sahar-hañgām

sukūt-e-shab meñ sitāroñ kī bazm-ārā.ī

vo mai-kade meñ sar-e-shām mai-kashoñ kā hujūm

pilā.e jaam vo saaqī ne sab kī ban aa.ī

hasīn raat kī sohbat sabā kī sargoshī

urūs-e-māh chhupī bādaloñ meñ sharmā.ī

jahāñ bhī husn kī jalva-numā.iyāñ dekhīñ

tumhārī yaad mirī jaan be-hisāb aa.ī

ye mah-o-sal ki gardish ye meri tanhai

ye zindagi ka safar aur ye aabla-pai

bahut hasin hai ye manzar magar tumhaare baghair

mere wajud pe har dam hai murdani chhai

agarche aam hai fitrat ka husn har jaanib

mere liye to kashish is mein hai na zebai

ye kaenat-o-kawakib ye kahkashan ye shahab

zamin ka ye tasalsul falak ki pahnai

bulandi koh ki sahra ki be-karan wusat

nadi ka shor ho ya bahr ki ho gahrai

nasheb-e-koh mein sabze ka maKHmalin bistar

shafaq ka surKH libaada gulon ki ranai

jawar-e-sahn-e-gulistan mein aahuon ka KHiram

chaman mein shoKH anadil ki naghma-arai

shah-e-nujum ki aamad ki dil-pazir KHabar

nasim-e-subh gali kuchon mein suna aai

kiran ka phuTna mashriq se ba-sahar-hangam

sukut-e-shab mein sitaron ki bazm-arai

wo mai-kade mein sar-e-sham mai-kashon ka hujum

pilae jam wo saqi ne sab ki ban aai

hasin raat ki sohbat saba ki sargoshi

urus-e-mah chhupi baadalon mein sharmai

jahan bhi husn ki jalwa-numaiyan dekhin

tumhaari yaad meri jaan be-hisab aai