تمھارے جیسا کوئی نہیں ہے

محبتوں کی مہکتی شاموں کا دل ربا سا خیال تم ہو

خلوص انمول ہے تمہارا

سنو سراپا جمال تم ہو

کمال تم ہو

مرے لیے زندگی کی زندہ مثال تم ہو

وہ کہہ رہی تھی

حسین خوابوں کی چلمنوں سے

میں تم کو سنتی ہوں دھڑکنوں سے

تو خوشبو آتی ہے کنگنوں سے

مجھے تمھارے گداز لہجے سے لطف آتا ہے زندگی کا

تمہی سے رشتہ ہے ہر خوشی کا

وہ کہہ رہی تھی

میں سن رہا تھا

میں زیر لب مسکراہٹیں اس کی چن رہا تھا

میں اس کے لفظوں سے

تازہ نظموں کا تانا بانا سا بن رہا تھا

کہ دل جو ہارا

تو اس کے ہونٹوں پہ نرم احساس سے بھرا اپنا ہاتھ رکھ کر

کہا خدارا

سنو تو یارا

تمہاری آنکھوں سے دیکھتا ہوں تو ساری دنیا بہت حسیں ہے

جو میری نظروں سے تم بھی دیکھو

تمھارے جیسا کوئی نہیں ہے