tumhaari manzil kahin nahin hai

bebasī kā azaab

udaas rastoñ pe chalne vaalo

udāsiyoñ kā safar muqaddar hai

tum ye raste badal bhī lo to nishān-e-manzil

tumhārī āñkhoñ kī tīrgī meñ

lipaT ke be-nām ho rahegā

ye shahr ye bastiyāñ ye qarye

bas ek be-nām ḳhauf kī zad meñ aa ga.e haiñ

tumhārī āñkhoñ meñ

kin ḳhizāoñ kī zard vīrāniyāñ basī haiñ

tumhāre hoñToñ pe zahr-e-be-rañg kī taheñ kis liye jamī haiñ

tumhāre chehroñ kā ḳhaak sā rañg

kaun se dard kā asar hai

udaas rastoñ pe chalne vaalo

agar ummīdoñ ke peḌ patjhaḌ kī zad meñ haiñ

to unheñ jaḌoñ se ukhāḌ pheñko

tumhārī āñkhoñ meñ zard vīrāniyāñ basī haiñ

to apnī āñkhoñ nikāl Daalo

tumhāre shahroñ meñ ḳhauf aaseb ban gayā hai

to sab makānoñ ko raakh kar do

magar kabhī yuuñ na ho sakegā

ki jo banāne kī aarzū meñ bigāḌte haiñ

vo haath hī bebasī ke pinjre meñ band haiñ

un udaas rastoñ pe chalne vaalo

mujhe bhī hamrāh le ke chalnā

ki maiñ akelā kahāñ rahūñgā

bebasi ka azab

udas raston pe chalne walo

udasiyon ka safar muqaddar hai

tum ye raste badal bhi lo to nishan-e-manzil

tumhaari aankhon ki tirgi mein

lipaT ke be-nam ho rahega

ye shahr ye bastiyan ye qarye

bas ek be-nam KHauf ki zad mein aa gae hain

tumhaari aankhon mein

kin KHizaon ki zard viraniyan basi hain

tumhaare honTon pe zahr-e-be-rang ki tahen kis liye jami hain

tumhaare chehron ka KHak sa rang

kaun se dard ka asar hai

udas raston pe chalne walo

agar ummidon ke peD patjhaD ki zad mein hain

to unhen jaDon se ukhaD phenko

tumhaari aankhon mein zard viraniyan basi hain

to apni aankhon nikal Dalo

tumhaare shahron mein KHauf aaseb ban gaya hai

to sab makanon ko rakh kar do

magar kabhi yun na ho sakega

ki jo banane ki aarzu mein bigaDte hain

wo hath hi bebasi ke pinjre mein band hain

un udas raston pe chalne walo

mujhe bhi hamrah le ke chalna

ki main akela kahan rahunga