tumhaari wajh se

agarche ye sach hai

ka.ī baar dil merā behad dukhā hai tumhārī vaj.h se

ka.ī baar palkoñ pe aa.e haiñ aañsū tumhārī vaj.h se

ka.ī baar sahnī paḌī saḳht lahje kī tezī o tundī tumhārī vaj.h se

ka.ī martaba nā-munāsib ravayya bhī jhelā hai maiñ ne tumhārī vaj.h se

ka.ī baar be-bāt ġhusse kī zad par bhī aanā paḌā hai tumhārī vaj.h se

ka.ī martaba izzat-e-nafs ko taaq par rakh ke sorry bhī kahnā paḌā hai tumhārī vaj.h se

to ye bhī to sach hai

jo is pahle sach se kahīñ mo'atabar hai baḌā dil-nashīñ hai

ki aksar milā hai mire ġham ko marham tumhārī vaj.h se

ka.ī baar maiñ rote rote hañsī huuñ tumhārī vaj.h se

mire āñsuoñ ko mayassar huā ek bar-vaqt kandhā tumhārī vaj.h se

ka.ī baar afsurdagī ke samundar meñ girne se pahle bachā.ī ga.ī huuñ tumhārī vaj.h se

hunar zabt-e-girya kā dar aayā mujh meñ tumhārī vaj.h se

hue vā shu.ūr-e-ġham-e-zīst ke dar tumhārī vaj.h se

ujāgar huā mujh meñ ehsās-e-hastī tumhārī vaj.h se

huā munkashif lafz-e-iḳhlās mujh pe tumhārī vaj.h se

huā fahm-o-idrāk sachchī ḳhushī kā tumhārī vaj.h se

tumhārī vaj.h se hī masrūr-o-shādāb rahne lagī huuñ

agarche maiñ andar se TuuTī huī huuñ

magar phir bhī ab tak jo bikhrī nahīñ huuñ tumhārī vaj.h se

ye sach hai mire dost maiñ jī rahī huuñ tumhārī vaj.h se

agarche ye sach hai

kai bar dil mera behad dukha hai tumhaari wajh se

kai bar palkon pe aae hain aansu tumhaari wajh se

kai bar sahni paDi saKHt lahje ki tezi o tundi tumhaari wajh se

kai martaba na-munasib rawayya bhi jhela hai main ne tumhaari wajh se

kai bar be-baat ghusse ki zad par bhi aana paDa hai tumhaari wajh se

kai martaba izzat-e-nafs ko taq par rakh ke sorry bhi kahna paDa hai tumhaari wajh se

to ye bhi to sach hai

jo is pahle sach se kahin mo'atabar hai baDa dil-nashin hai

ki aksar mila hai mere gham ko marham tumhaari wajh se

kai bar main rote rote hansi hun tumhaari wajh se

mere aansuon ko mayassar hua ek bar-waqt kandha tumhaari wajh se

kai bar afsurdagi ke samundar mein girne se pahle bachai gai hun tumhaari wajh se

hunar zabt-e-girya ka dar aaya mujh mein tumhaari wajh se

hue wa shuur-e-gham-e-zist ke dar tumhaari wajh se

ujagar hua mujh mein ehsas-e-hasti tumhaari wajh se

hua munkashif lafz-e-iKHlas mujh pe tumhaari wajh se

hua fahm-o-idrak sachchi KHushi ka tumhaari wajh se

tumhaari wajh se hi masrur-o-shadab rahne lagi hun

agarche main andar se TuTi hui hun

magar phir bhi ab tak jo bikhri nahin hun tumhaari wajh se

ye sach hai mere dost main ji rahi hun tumhaari wajh se