tumhaari yaad

muddatoñ baad phir ubhrī hai tumhārī tasvīr

mere vīrān ḳhayālāt kī gahrā.ī meñ

tum ne ḳhvāboñ meñ na aane kī qasam khaa.ī thī

kyoñ muḳhil aa ke hue phir mirī tanhā.ī meñ

zalzale tum se haiñ vābasta tumheñ kyā ma.alūm

aaj halchal sī machī hai dil-e-saudā.ī meñ

maiñ tumheñ kho ke ye sochā thā ki ḳhud ko DhūñDhuñ

kyā ajab hai ki mile apnā kinārā mujh ko

haif-sad-haif magar TuuT gayā merā tilism

tum ne maazī ke shabistāñ se pukārā mujh ko

jagmagā uTThe tasavvur meñ charāġh-e-mahfil

tum nazar aane lage anjuman-ārā mujh ko

maqbara merī tamannāoñ kā maazī kā harīm

jis meñ madfūn haiñ murde mire afsānoñ ke

tum pe maftūn kam-andesha vo majnūn-e-shabāb

aur uḌte hue purze vo garebānoñ ke

bārish-e-ashk phir us garmī-e-vahshat ke baad

jis meñ andāz machalte hue tūfānoñ ke

kabhī rātoñ meñ ghulā nashsha-e-sahbā-e-bahār

kabhī sub.hoñ meñ mirī garmī-e-hangām-e-nushūr

ishq betāb magar husn ko pābandī-e-vaz.a

mere vārafta taqāze the magar tum majbūr

bevafā tum ko jo kah detā thā jhuñjhlāhaT meñ

DabDabā aatī thiiñ ashkoñ se vo āñkheñ maḳhmūr

jab mirī jaan tumhīñ bhuul ga.e ho mujh ko

yaad se apnī ye kah do ki satā.e na mujhe

baḌī mushkil se ye lamhāt-e-sukūñ aa.e haiñ

shorish-e-ishq ba-takrār hilā.e na mujhe

mere vīrāne meñ paidā haiñ kuchh āsār-e-bahār

qissa-e-daur-e-junūñ koī sunā.e na mujhe

ab to vo valvala-e-ahd-e-javānī bhī nahīñ

vaqt merā ye nahīñ ishq ke hangāmoñ kā

mujh ko maazī se mire duur hī bas rahne do

zikr hai dard-rasāñ TuuTe hue jāmoñ kā

maiñ alag tum se thā yā merā hī partav the tum

mujh ko mafhūm samajhne do in ibhāmoñ kā

muddaton baad phir ubhri hai tumhaari taswir

mere viran KHayalat ki gahrai mein

tum ne KHwabon mein na aane ki qasam khai thi

kyon muKHil aa ke hue phir meri tanhai mein

zalzale tum se hain wabasta tumhein kya malum

aaj halchal si machi hai dil-e-saudai mein

main tumhein kho ke ye socha tha ki KHud ko DhunDhun

kya ajab hai ki mile apna kinara mujh ko

haif-sad-haif magar TuT gaya mera tilism

tum ne mazi ke shabistan se pukara mujh ko

jagmaga uTThe tasawwur mein charagh-e-mahfil

tum nazar aane lage anjuman-ara mujh ko

maqbara meri tamannaon ka mazi ka harim

jis mein madfun hain murde mere afsanon ke

tum pe maftun kam-andesha wo majnun-e-shabab

aur uDte hue purze wo garebanon ke

barish-e-ashk phir us garmi-e-wahshat ke baad

jis mein andaz machalte hue tufanon ke

kabhi raaton mein ghula nashsha-e-sahba-e-bahaar

kabhi subhon mein meri garmi-e-hangam-e-nushur

ishq betab magar husn ko pabandi-e-waza

mere warafta taqaze the magar tum majbur

bewafa tum ko jo kah deta tha jhunjhlahaT mein

DabDaba aati thin ashkon se wo aankhen maKHmur

jab meri jaan tumhin bhul gae ho mujh ko

yaad se apni ye kah do ki satae na mujhe

baDi mushkil se ye lamhat-e-sukun aae hain

shorish-e-ishq ba-takrar hilae na mujhe

mere virane mein paida hain kuchh aasar-e-bahaar

qissa-e-daur-e-junun koi sunae na mujhe

ab to wo walwala-e-ahd-e-jawani bhi nahin

waqt mera ye nahin ishq ke hangamon ka

mujh ko mazi se mere dur hi bas rahne do

zikr hai dard-rasan TuTe hue jamon ka

main alag tum se tha ya mera hi partaw the tum

mujh ko mafhum samajhne do in ibhamon ka