tumhein jaane ki jaldi hai

hameñ jaldī meñ chhoḌe jā rahe ho

tumheñ jānāñ ijāzat hai

magar socho

kabhī jab ham nahīñ hoñge

to dil kī bekalī kis ko batāoge

kaho jīvan ke be-āsār rastoñ par

safar kī gard jab

bīnā.ī kā sūraj bujhā degī

to phir kis ko pukāroge

badan ko chīrtī tanhā.ī par phailā.e

jab har ek sū hogī

to us lamhe

'farāz'-o-'faiz' kī ġhazloñ pe kis se guftugū hogī

kise 'jagjīt' ke siskī bhare gītoñ meñ DhūñDoge

kise 'parvīn' ke ḳhushbū meñ Duube sher tum message meñ bhejoge

kise 'gulzār' kī uljhī huī nazmeñ sunāoge

kaho phir shab ga.e

'manto' ke afsānoñ pe kis se guftugū hogī

mujhe tanhā.ī ke sahrā meñ tanhā chhoḌ kar

āḳhir tumheñ bhī ḳhushbūoñ ke des jaanā hai

jahāñ ḳhvāboñ ke jugnū kitnī sadiyoñ se

tumhāre muntazir haiñ

tumheñ kis muñh se ham rokeñ magar jānāñ

kabhī jab ham nahīñ hoñge

to is duniyā ke mele meñ kise apnā kahoge tum

kise 'arshad' pukāroge

bayāz-e-dil pe kis kī surma.ī nazmeñ utāroge

udāsī ke sitāre

jab tumhāre chaar jānib

jhilmilā.eñge

ga.e mausam ke bāshe yaad ke sahrāoñ meñ miTTī uḌā.eñge

to us lamhe

tumheñ ham yaad ā.eñge

magar jānāñ

tumheñ jaane kī jaldī hai

hamein jaldi mein chhoDe ja rahe ho

tumhein jaanan ijazat hai

magar socho

kabhi jab hum nahin honge

to dil ki bekali kis ko bataoge

kaho jiwan ke be-asar raston par

safar ki gard jab

binai ka suraj bujha degi

to phir kis ko pukaroge

badan ko chirti tanhai par phailae

jab har ek su hogi

to us lamhe

'faraaz'-o-'faiz' ki ghazlon pe kis se guftugu hogi

kise 'jagjit' ke siski bhare giton mein DhunDoge

kise 'parwin' ke KHushbu mein Dube sher tum message mein bhejoge

kise 'gulzar' ki uljhi hui nazmen sunaoge

kaho phir shab gae

'manto' ke afsanon pe kis se guftugu hogi

mujhe tanhai ke sahra mein tanha chhoD kar

aaKHir tumhein bhi KHushbuon ke des jaana hai

jahan KHwabon ke jugnu kitni sadiyon se

tumhaare muntazir hain

tumhein kis munh se hum roken magar jaanan

kabhi jab hum nahin honge

to is duniya ke mele mein kise apna kahoge tum

kise 'arshad' pukaroge

bayaz-e-dil pe kis ki surmai nazmen utaroge

udasi ke sitare

jab tumhaare chaar jaanib

jhilmilaenge

gae mausam ke bashe yaad ke sahraon mein miTTi uDaenge

to us lamhe

tumhein hum yaad aaenge

magar jaanan

tumhein jaane ki jaldi hai