tumhein kya

tumheñ kyā

zindagī jaisī bhī hai

tum ne us ke har adā se rañg kī maujeñ nichoḌī haiñ

tumheñ to TuuT kar chāhā gayā chehroñ ke mele meñ

mohabbat kī shafaq barsī tumhāre ḳhāl-o-ḳhad par

aa.ine chamke tumhārī diid se

ḳhushbū tumhāre pairahan kī har shikan se

izn le kar har taraf vahshat luTātī thī

tumhāre chāhne vāloñ ke jhurmuT meñ

sabhī āñkheñ tumhāre āriz-o-lab kī kanīzeñ thiiñ

tumheñ kyā

tum ne har mausam kī shah-e-rag meñ uñDele zā.iqe apne

tumheñ kyā

tum ne kab sochā

ki chehroñ se aTī duniyā meñ tanhā saañs letī

hāñptī rātoñ ke be-ghar ham-safar

kitnī mashaqqat se garebān-e-sahar ke chaak siite haiñ

tumheñ kyā

tum ne kab sochā

ki tanhā.ī ke jañgal meñ

siyah lamhoñ kī chubhtī kirchiyoñ se kaun khelā hai

tumheñ kyā

tum ne kab sochā

ki chehroñ se aTī duniyā meñ

kis kā dil akelā hai

tumhein kya

zindagi jaisi bhi hai

tum ne us ke har ada se rang ki maujen nichoDi hain

tumhein to TuT kar chaha gaya chehron ke mele mein

mohabbat ki shafaq barsi tumhaare KHal-o-KHad par

aaine chamke tumhaari did se

KHushbu tumhaare pairahan ki har shikan se

izn le kar har taraf wahshat luTati thi

tumhaare chahne walon ke jhurmuT mein

sabhi aankhen tumhaare aariz-o-lab ki kanizen thin

tumhein kya

tum ne har mausam ki shah-e-rag mein unDele zaiqe apne

tumhein kya

tum ne kab socha

ki chehron se aTi duniya mein tanha sans leti

hanpti raaton ke be-ghar ham-safar

kitni mashaqqat se gareban-e-sahar ke chaak site hain

tumhein kya

tum ne kab socha

ki tanhai ke jangal mein

siyah lamhon ki chubhti kirchiyon se kaun khela hai

tumhein kya

tum ne kab socha

ki chehron se aTi duniya mein

kis ka dil akela hai