tumhein maine bataya tha

shikasta-pā nahīñ dekho

shikasta-rūh bhī huuñ maiñ

mire maflūj hāthoñ ko hayāt-e-nau kā ab koī ishāra mat dikhā denā

mirī be-nūr āñkhoñ ko naved-e-ḳhvāb-e-ulfat mat sunā denā

batāyā thā ki muddat se

mire ma.azūr pairoñ ne kisī ke saath chalne kī

ijāzat tak nahīñ dī hai

mire TuuTe badan meñ zindagī kā ek bhī zarra nahīñ baaqī

tumheñ to sab batāyā thā

tumheñ zid thī

tumheñ zid thī mire pairoñ tale palkeñ bichhāoge

tumheñ zid thī ki tum merī hathelī par dhaḌakte dil ko rakkhoge

tumheñ zid thī ki bujhtī ruuh par tum zindagī kī aag rakkhoge

tumhārī zid ke aage haar maanī

phir se ik dam toḌtī ummīd ke dhāgoñ se zaḳhmoñ ko siyā

ḳhud ko tumheñ sauñpā

magar jo ab ke TuuTā hai

mire TukḌoñ ke TukḌe haiñ

kabhī bhī juḌ na pā.eñge

agar ye juḌ bhī jaa.eñ to

nahīñ imkāñ koī ab in meñ merī ruuh bhī hogī

shikasta-pa nahin dekho

shikasta-ruh bhi hun main

mere mafluj hathon ko hayat-e-nau ka ab koi ishaara mat dikha dena

meri be-nur aankhon ko nawed-e-KHwab-e-ulfat mat suna dena

bataya tha ki muddat se

mere mazur pairon ne kisi ke sath chalne ki

ijazat tak nahin di hai

mere TuTe badan mein zindagi ka ek bhi zarra nahin baqi

tumhein to sab bataya tha

tumhein zid thi

tumhein zid thi mere pairon tale palken bichhaoge

tumhein zid thi ki tum meri hatheli par dhaDakte dil ko rakkhoge

tumhein zid thi ki bujhti ruh par tum zindagi ki aag rakkhoge

tumhaari zid ke aage haar mani

phir se ek dam toDti ummid ke dhagon se zaKHmon ko siya

KHud ko tumhein saunpa

magar jo ab ke TuTa hai

mere TukDon ke TukDe hain

kabhi bhi juD na paenge

agar ye juD bhi jaen to

nahin imkan koi ab in mein meri ruh bhi hogi