tu agar sair ko nikle

tū agar sair ko nikle to ujālā ho jaa.e

surma.ī shaal kā Daale hue māthe pe sirā

baal khole hue sandal kā lagā.e Tiikā

yuuñ jo hañstī huī tū sub.h ko aa jaa.e zarā

bāġh-e-kashmīr ke phūloñ ko achambhā ho jaa.e

tū agar sair ko nikle to ujālā ho jaa.e

le ke añgḌā.ī jo tū ghaaT pe badle pahlū

chaltā phirtā nazar aa jaa.e nadī par jaadū

jhuk ke muñh apnā jo gañgā meñ zarā dekh le tū

nithre paanī kā mazā aur bhī mīThā ho jaa.e

tū agar sair ko nikle to ujālā ho jaa.e

sub.h ke rañg ne baḳhshā hai vo mukhḌā tujh ko

shaam kī chhāñv ne sauñpā hai vo joḌā tujh ko

ki kabhī paas se dekhe jo himāla tujh ko

is tire qad kī qasam aur bhī ūñchā ho jaa.e

tū agar sair ko nikle to ujālā ho jaa.e

tu agar sair ko nikle to ujala ho jae

surmai shaal ka Dale hue mathe pe sira

baal khole hue sandal ka lagae Tika

yun jo hansti hui tu subh ko aa jae zara

bagh-e-kashmir ke phulon ko achambha ho jae

tu agar sair ko nikle to ujala ho jae

le ke angDai jo tu ghaT pe badle pahlu

chalta phirta nazar aa jae nadi par jadu

jhuk ke munh apna jo ganga mein zara dekh le tu

nithre pani ka maza aur bhi miTha ho jae

tu agar sair ko nikle to ujala ho jae

subh ke rang ne baKHsha hai wo mukhDa tujh ko

sham ki chhanw ne saunpa hai wo joDa tujh ko

ki kabhi pas se dekhe jo himala tujh ko

is tere qad ki qasam aur bhi uncha ho jae

tu agar sair ko nikle to ujala ho jae