tu bhi aisa sochti hogi

vaqt ne ham ko kis raste par lā Daalā hai

donoñ

ik an-chāhī ham-rāhī kī suulī le kar

bojhal bojhal paañv dharte jaa.eñ chalte jaa.eñ

tū bhī āḳhir insāñ hai

tere paas bhī armānoñ kā resham hogā

kabhī kabhī to tū bhī dard kī suuī le kar

koī lamha kāḌhtī hogī

chalte chalte kabhī kabhī koī bhīgā pul

ga.e dinoñ ke bahr meñ tujh ko jal-thal karnā hogā

mere paas bhī ḳhvāboñ kī

kuchh dhajjiyāñ baaqī haiñ

maiñ bhī akasr chalte chalte kho jaatā huuñ

in dhajjiyoñ ko joḌtā rahtā huuñ

ḳhud ko in meñ DhūñDhtā rahtā huuñ

kabhī kabhī bistar meñ leTe

maiñ ne apne aur tire mābain

aise aise lā-mutanāhī dariyā haa.el dekhe haiñ

jin par kisī bhī rishte kā koī pul nahīñ banñe paatā

ik aisī majbūr sī hamdardī kī Dorī meñ

ham donoñ bañdhe hue haiñ

jis meñ ham ne samjhautoñ kī

kitnī gāñTheñ Daal rakhī haiñ

vaqt kā jabr bhī kaisā hai

tujh ko ''tū'' nahīñ rahne detā

mujh ko ''maiñ'' nahīñ hone detā

jismoñ kī yakjā.ī kahīñ kartā hai

rūheñ aur kahīñ chhoḌ aatā hai

waqt ne hum ko kis raste par la Dala hai

donon

ek an-chahi ham-rahi ki suli le kar

bojhal bojhal panw dharte jaen chalte jaen

tu bhi aaKHir insan hai

tere pas bhi armanon ka resham hoga

kabhi kabhi to tu bhi dard ki sui le kar

koi lamha kaDhti hogi

chalte chalte kabhi kabhi koi bhiga pul

gae dinon ke bahr mein tujh ko jal-thal karna hoga

mere pas bhi KHwabon ki

kuchh dhajjiyan baqi hain

main bhi akasr chalte chalte kho jata hun

in dhajjiyon ko joDta rahta hun

KHud ko in mein DhunDhta rahta hun

kabhi kabhi bistar mein leTe

main ne apne aur tere mabain

aise aise la-mutanahi dariya hael dekhe hain

jin par kisi bhi rishte ka koi pul nahin banne pata

ek aisi majbur si hamdardi ki Dori mein

hum donon bandhe hue hain

jis mein hum ne samjhauton ki

kitni ganThen Dal rakhi hain

waqt ka jabr bhi kaisa hai

tujh ko tu nahin rahne deta

mujh ko main nahin hone deta

jismon ki yakjai kahin karta hai

ruhen aur kahin chhoD aata hai