tu KHafa ho to bahut dur kahin

rāste gard meñ aTte hue raahī se bichhaḌ jaate haiñ

ḳhuun rotī huī āñkhoñ meñ kahīñ shaam utar jaatī hai

āsmāñ ke sabhī jhilmil se munavvar taare

raakh ban kar kisī tārīk samundar meñ bhaTak jaate haiñ

phuul jo shāḳh kī zīnat the bikhar jaate haiñ

ajnabī des meñ phir duur bahut duur kahīñ

ek hañstā sā munavvar chehra

kaisī tārīk udāsī meñ utar jaatā hai

us kī jaltī huī āñkhoñ kā pighaltā kājal

ashk ban kar kahīñ takiye pe bikhar jaatā hai

jal-tarañg jaisī hañsī shoḳh tabassum us kā

aisā lagtā hai ghane dard meñ kho jaatā hai

us kī palkoñ pe machalte aañsū

thak ke phir hijr kī dahlīz pe so jaate haiñ

aur vo kitne dinoñ tak ḳhud ko

niim tārīk se kamre meñ muqayyad kar ke

zahr ke jaam piyā kartī hai

niiñd aur ḳhvāb ke mābain sulagte pal meñ

bas tujhe yaad kiyā kartī hai

ik tirā naam liyā kartī hai

us kī āñkhoñ meñ tire naam ko sun kar aksar

aisā lagtā hai hazāroñ hī diye jalte haiñ

us kī duniyā ke suhāne manzar

naqsh bante haiñ tirī yaad ke sañg chalte haiñ

hañste gaate hue jugnū panchhī

ābshāroñ kā tarannum jaise

apnī hastī kā takallum jaise

saut-o-āhang ke sab rang hamesha ke liye

dard-o-āshob kī āvāz meñ Dhal jaate haiñ

tū ḳhafā ho to bahut duur bahut duur kahīñ

ek laḌkī ke shab-o-roz badal jaate haiñ

raste gard mein aTte hue rahi se bichhaD jate hain

KHun roti hui aankhon mein kahin sham utar jati hai

aasman ke sabhi jhilmil se munawwar tare

rakh ban kar kisi tarik samundar mein bhaTak jate hain

phul jo shaKH ki zinat the bikhar jate hain

ajnabi des mein phir dur bahut dur kahin

ek hansta sa munawwar chehra

kaisi tarik udasi mein utar jata hai

us ki jalti hui aankhon ka pighalta kajal

ashk ban kar kahin takiye pe bikhar jata hai

jal-tarang jaisi hansi shoKH tabassum us ka

aisa lagta hai ghane dard mein kho jata hai

us ki palkon pe machalte aansu

thak ke phir hijr ki dahliz pe so jate hain

aur wo kitne dinon tak KHud ko

nim tarik se kamre mein muqayyad kar ke

zahr ke jam piya karti hai

nind aur KHwab ke mabain sulagte pal mein

bas tujhe yaad kiya karti hai

ek tera nam liya karti hai

us ki aankhon mein tere nam ko sun kar aksar

aisa lagta hai hazaron hi diye jalte hain

us ki duniya ke suhane manzar

naqsh bante hain teri yaad ke sang chalte hain

hanste gate hue jugnu panchhi

aabshaaron ka tarannum jaise

apni hasti ka takallum jaise

saut-o-ahang ke sab rang hamesha ke liye

dard-o-ashob ki aawaz mein Dhal jate hain

tu KHafa ho to bahut dur bahut dur kahin

ek laDki ke shab-o-roz badal jate hain