tu meri nazm hai jaan-e-man

tū mirī nazm hai

ḳhud meñ marbūt gum apnī dhun meñ ravāñ

pech-dar-pech āzād aur be-niyāz aur mub.ham

andarūnī-o-bairūnī āhang meñ

apne iz.hār-e-sad-rang meñ

naġhmagī añg meñ terī āvāz aur rang meñ

ye uThān

ye kamān

ye kamāñ se nikalte hue tiir sab bar-hadaf

tez chust

ramz meñ aur iz.hār-e-bebāk meñ bhī ishāre liye

apne hī isti.āre liye

jo kahānī kahe

kah ke bhī an-kahī an-sunī hī rahe

vasl-e-ma.anī ke pahlū meñ pahlū-e-tishna-labī hī rahe

kuchh kamī hī rahe

tujh ko pā kar tujhe aur paane kī tajdīd-e-iblāġh ke kaif meñ bār-bār

satr-dar-satr paḌhtā rahūñ

zulfoñ peshānī āñkhoñ se aariz laboñ se tire paañv kī āḳhirī por tak

mire lams se

lauh-e-dil par tirī raushnā.ī pe ik harf aa.e nahīñ

sar-basar to jamī kī jamī hī rahe

saare asrār khulte raheñ band darvāzoñ par aur asrār ke

aur bhī be-panah hoñ ma.ānī tire ek iqrār aur besh inkār ke

maiñ ta.āqub meñ jin ke rahūñ umr-bhar

tū mirī nazm hai jān-e-man

tu meri nazm hai

KHud mein marbut gum apni dhun mein rawan

pech-dar-pech aazad aur be-niyaz aur mubham

andaruni-o-bairuni aahang mein

apne izhaar-e-sad-rang mein

naghmagi ang mein teri aawaz aur rang mein

ye uThan

ye kaman

ye kaman se nikalte hue tir sab bar-hadaf

tez chust

ramz mein aur izhaar-e-bebak mein bhi ishaare liye

apne hi istiare liye

jo kahani kahe

kah ke bhi an-kahi an-suni hi rahe

wasl-e-mani ke pahlu mein pahlu-e-tishna-labi hi rahe

kuchh kami hi rahe

tujh ko pa kar tujhe aur pane ki tajdid-e-iblagh ke kaif mein bar-bar

satr-dar-satr paDhta rahun

zulfon peshani aankhon se aariz labon se tere panw ki aaKHiri por tak

mere lams se

lauh-e-dil par teri raushnai pe ek harf aae nahin

sar-basar to jami ki jami hi rahe

sare asrar khulte rahen band darwazon par aur asrar ke

aur bhi be-panah hon maani tere ek iqrar aur besh inkar ke

main taaqub mein jin ke rahun umr-bhar

tu meri nazm hai jaan-e-man