tu nahin jaanti

tere hoñToñ se bahtī huī ye hañsī

do-jahānoñ pe nāfiz na hone kā baa.is

tire haath haiñ

jin ko tū ne hamesha laboñ par rakhā muskurāte hue

tū nahīñ jāntī

niiñd kī goliyāñ kyoñ banā.ī ga.iiñ

log kyoñ raat ko uTh ke rote haiñ sote nahīñ

tū ne ab tak koī shab agar jāgte bhī guzārī

to vo barbie night thī

tujh ko kaise batā.ūñ

ki terī sadā ke ta'āqub meñ

maiñ kaise dariyāoñ sahrāoñ aur jangaloñ se guzartā huā

ek aisī jagah jā girā thā

jahāñ peḌ kā sūkhnā 'aam sī baat thī

jahāñ un charāġhoñ ko jalne kī ujrat nahīñ mil rahī thī

jahāñ laḌkiyoñ ke badan sirf ḳhushbū banāne ke kaam aate the

jahāñ ek mā'sūm bachcha parinde pakaḌne ke saare hunar jāntā thā

mujh ko mā'lūm thā

terā aise jahāñ aisī duniyā se koī ta'alluq nahīñ

tū nahīñ jāntī

kitnī āñkheñ tujhe dekhte dekhte bujh ga.iiñ

kitne kurte tire haath se istirī ho ke jalne kī ḳhvāhish meñ khūñTī se laTke rahe

kitne lab tere māthe ko tarse

kitnī shahrāheñ is shauq meñ phaT ga.ī haiñ

ki tū un ke siine pe paañv dhare

maiñ tujhe DhūñDte DhūñDhte thak gayā huuñ

ab mujhe terī maujūdgī chāhiye

apne sāTan meñ sahme hue surḳh pairoñ ko ab mere hāthoñ pe rakh

maiñ ne chakhnā hai in kā namak

tere honTon se bahti hui ye hansi

do-jahanon pe nafiz na hone ka bais

tere hath hain

jin ko tu ne hamesha labon par rakha muskuraate hue

tu nahin jaanti

nind ki goliyan kyon banai gain

log kyon raat ko uTh ke rote hain sote nahin

tu ne ab tak koi shab agar jagte bhi guzari

to wo barbie night thi

tujh ko kaise bataun

ki teri sada ke ta'aqub mein

main kaise dariyaon sahraon aur jangalon se guzarta hua

ek aisi jagah ja gira tha

jahan peD ka sukhna 'am si baat thi

jahan un charaghon ko jalne ki ujrat nahin mil rahi thi

jahan laDkiyon ke badan sirf KHushbu banane ke kaam aate the

jahan ek ma'sum bachcha parinde pakaDne ke sare hunar jaanta tha

mujh ko ma'lum tha

tera aise jahan aisi duniya se koi ta'alluq nahin

tu nahin jaanti

kitni aankhen tujhe dekhte dekhte bujh gain

kitne kurte tere hath se istiri ho ke jalne ki KHwahish mein khunTi se laTke rahe

kitne lab tere mathe ko tarse

kitni shahrahen is shauq mein phaT gai hain

ki tu un ke sine pe panw dhare

main tujhe DhunDte DhunDhte thak gaya hun

ab mujhe teri maujudgi chahiye

apne saTan mein sahme hue surKH pairon ko ab mere hathon pe rakh

main ne chakhna hai in ka namak