tu ne puchha hai mere dost!

tū ne pūchhā hai mire dost to maiñ sochtī huuñ

vo jo ik chiiz hai duniyā jise ġham kahtī hai

mujhe taslīm, mirā us se ilāqa na rahā

zindagī goyā koī sej rahī phūloñ kī

phir vo kyā hai ki jo kāñToñ sī chubhā kartī hai

maiñ ne dekhī haiñ vo be-mehr nigāheñ ai dost

jin kī begānagī dil chiir diyā kartī hai

maiñ ne ghūme haiñ vo tanhā.ī ke āseb-nagar

jin kī sarhad pe kahīñ maut phirā kartī hai

maiñ ne kaaTī haiñ vo sub.heñ ki jabīñ par jin kī

tīrgī barf ke mānind girā kartī hai

apne āñgan meñ milī vahshat-e-sahrā mujh ko

ġhairiyat jis meñ bagūloñ sī uḌā kartī hai

kaun samjhegā ki ne.amat se bharī jannat meñ

ajnabiyyat ke azāboñ kī malāmat kyā hai

mehr-o-altāf-o-ināyat ke fusūñ-ḳhāne meñ

paas rahte hue duurī kī aziyyat kyā hai

zindagī kī to alāmat hai ye ehsās magar

jaañ nikāle jo, ye ehsās kī shiddat kyā hai

dard har ek umūmī nahīñ hotā varna

koī kah de to hameñ kahne kī hājat kyā hai

zindagī ho bhī aur ehsās kī suulī pe rahe

dast-e-qudrat kī ḳhudā jāniye ġhāyat kyā hai

jaane kyuuñ hai ki sahar-kārī-e-taḳh.īl kā dam

roz-o-fardā meñ badalte hue ghaT jaatā hai

apnī ta.abīr meñ Dhalte hue afsūñ kā sirā

jaane kis taur kaf-e-ḳhvāb se chhuT jaatā hai

jab bhī lā-hāsilī imkān kī manzil dekhe

rah meñ asbāb-e-tamannā kahīñ luT jaatā hai

mil ke bhī kuchh nahīñ miltā hai jahāñ dost mire!

e'tibār-e-ġham-e-hastī vahāñ uTh jaatā hai

tū ne pūchhā hai mire dost to maiñ sochtī huuñ

apnā kyā haal batā.ūñ jo samajh aa jaa.e!

tu ne puchha hai mere dost to main sochti hun

wo jo ek chiz hai duniya jise gham kahti hai

mujhe taslim, mera us se ilaqa na raha

zindagi goya koi sej rahi phulon ki

phir wo kya hai ki jo kanTon si chubha karti hai

main ne dekhi hain wo be-mehr nigahen ai dost

jin ki beganagi dil chir diya karti hai

main ne ghume hain wo tanhai ke aaseb-nagar

jin ki sarhad pe kahin maut phira karti hai

main ne kaTi hain wo subhen ki jabin par jin ki

tirgi barf ke manind gira karti hai

apne aangan mein mili wahshat-e-sahra mujh ko

ghairiyat jis mein bagulon si uDa karti hai

kaun samjhega ki neamat se bhari jannat mein

ajnabiyyat ke azabon ki malamat kya hai

mehr-o-altaf-o-inayat ke fusun-KHane mein

pas rahte hue duri ki aziyyat kya hai

zindagi ki to alamat hai ye ehsas magar

jaan nikale jo, ye ehsas ki shiddat kya hai

dard har ek umumi nahin hota warna

koi kah de to hamein kahne ki hajat kya hai

zindagi ho bhi aur ehsas ki suli pe rahe

dast-e-qudrat ki KHuda jaaniye ghayat kya hai

jaane kyun hai ki sahar-kari-e-taKHil ka dam

roz-o-farda mein badalte hue ghaT jata hai

apni tabir mein Dhalte hue afsun ka sira

jaane kis taur kaf-e-KHwab se chhuT jata hai

jab bhi la-hasili imkan ki manzil dekhe

rah mein asbab-e-tamanna kahin luT jata hai

mil ke bhi kuchh nahin milta hai jahan dost mire!

e'tibar-e-gham-e-hasti wahan uTh jata hai

tu ne puchha hai mere dost to main sochti hun

apna kya haal bataun jo samajh aa jae!