TuTe shishe ki aaKHiri nazm

TuuTe shīshe kī āḳhirī nazm

bhāgte vaqt ko maiñ aaj pakaḌ laayā huuñ

ye mirā vaqt mire zehn kī taḳhlīq sahī

raat aur din ke tasalsul ko pareshāñ kar ke

maiñ ne lamhāt ko ik ruup diyā

sub.h ko raat kī zanjīr se āzād kiyā

ḳhvāb-o-bedī kī dīvār girā dī maiñ ne

zindagī maut se kab tak yuuñ hirāsāñ rahtī

kyā huā vaqt o haqīqat kā zavāl

maiñ

apnī TuuTī huī zanjīr kahāñ dafn karūñ

har taraf qabreñ mujāvir haiñ

devtāoñ ke muqaddas ajsām

har jagah dafn haiñ

koī vīrāna nahīñ duur talak

kyā mujhe apne hī zehn ke is goshe meñ

TuuTe ādarshoñ ke ā.īne meñ

vaqt ke aks ko dafnānā hai

TuTe shishe ki aaKHiri nazm

bhagte waqt ko main aaj pakaD laya hun

ye mera waqt mere zehn ki taKHliq sahi

raat aur din ke tasalsul ko pareshan kar ke

main ne lamhat ko ek rup diya

subh ko raat ki zanjir se aazad kiya

KHwab-o-bedi ki diwar gira di main ne

zindagi maut se kab tak yun hirasan rahti

kya hua waqt o haqiqat ka zawal

main

apni TuTi hui zanjir kahan dafn karun

har taraf qabren mujawir hain

dewtaon ke muqaddas ajsam

har jagah dafn hain

koi virana nahin dur talak

kya mujhe apne hi zehn ke is goshe mein

TuTe aadarshon ke aaine mein

waqt ke aks ko dafnana hai