TuTi jahan jahan pe kamand

rahā na kuchh bhī zamāne meñ jab nazar ko pasand

tirī nazar se kiyā rishta-e-nazar paivand

tire jamāl se har sub.h par vazū lāzim

har ek shab tire dar par sujūd kī pāband

nahīñ rahā haram-e-dil meñ ik sanam bātil

tire ḳhayāl ke lāt-o-manāt kī saugand

misāl-e-zīna-e-manzil ba-kār-e-shauq aayā

har ik maqām ki TuuTī jahāñ jahāñ pe kamand

ḳhizāñ tamām huī kis hisāb meñ likhiye

bahār-e-gul meñ jo pahuñche haiñ shāḳh-e-gul ko gazand

darīda-dil hai koī shahr meñ hamārī tarah

koī durīda-dahan shaiḳh-e-shahar ke mānind

shi.ār kī jo mudārāt-e-qāmat-e-jānāñ

kiyā hai 'faiz' dar-e-dil dar-e-falak se buland

raha na kuchh bhi zamane mein jab nazar ko pasand

teri nazar se kiya rishta-e-nazar paiwand

tere jamal se har subh par wazu lazim

har ek shab tere dar par sujud ki paband

nahin raha haram-e-dil mein ek sanam baatil

tere KHayal ke lat-o-manat ki saugand

misal-e-zina-e-manzil ba-kar-e-shauq aaya

har ek maqam ki TuTi jahan jahan pe kamand

KHizan tamam hui kis hisab mein likhiye

bahaar-e-gul mein jo pahunche hain shaKH-e-gul ko gazand

darida-dil hai koi shahr mein hamari tarah

koi durida-dahan shaiKH-e-shahar ke manind

shiar ki jo mudaraat-e-qamat-e-jaanan

kiya hai 'faiz' dar-e-dil dar-e-falak se buland