udas sham ki ek nazm

visāl-rut kī ye pahlī dastak hī sarzanish hai

ki hijr-mausam ne raste raste safar kā āġhāz kar diyā hai

tumhāre hāthoñ kā lams jab bhī mirī vafā kī hatheliyoñ par hinā banegā

to soch lūñgī

rafāqatoñ kā sunahrā sūraj ġhurūb ke imtihān meñ hai

hamāre bāġhoñ se gar kabhī titliyoñ kī ḳhushbū guzar na paa.e to ye na kahnā

ki titliyoñ ne gulāb-raste badal liye haiñ

agar koī shaam yuuñ bhī aa.e ki jis meñ ham tum lageñ parā.e

to jaan lenā

ki shaam be-bas thī shab kī tārīkiyoñ ke hāthoñ

tumhārī ḳhvāhish kī muTThiyāñ be-dhiyaniyoñ meñ kabhī khuleñ to yaqīn karnā

ki merī chāhat ke jugnuoñ ne

tumhāre hāthoñ ke lams-e-tāza kī ḳhvāhishoñ meñ

baḌe ghanere añdhere kaaTe

magar ye ḳhadshe, ye vasvase to takallufan haiñ

jo be-irāda safar pe nikleñ

to ye to hotā hai ye to hogā

ham apne jazboñ ko munjamid rā.egāñiyoñ ke supurd kar ke

ye soch leñge

ki hijr-emausam to vasl kī pahlī shaam se hī

safar kā āġhāz kar chukā thā

visal-rut ki ye pahli dastak hi sarzanish hai

ki hijr-mausam ne raste raste safar ka aaghaz kar diya hai

tumhaare hathon ka lams jab bhi meri wafa ki hatheliyon par hina banega

to soch lungi

rafaqaton ka sunahra suraj ghurub ke imtihan mein hai

hamare baghon se gar kabhi titliyon ki KHushbu guzar na pae to ye na kahna

ki titliyon ne gulab-raste badal liye hain

agar koi sham yun bhi aae ki jis mein hum tum lagen parae

to jaan lena

ki sham be-bas thi shab ki tarikiyon ke hathon

tumhaari KHwahish ki muTThiyan be-dhiyaniyon mein kabhi khulen to yaqin karna

ki meri chahat ke jugnuon ne

tumhaare hathon ke lams-e-taza ki KHwahishon mein

baDe ghanere andhere kaTe

magar ye KHadshe, ye waswase to takallufan hain

jo be-irada safar pe niklen

to ye to hota hai ye to hoga

hum apne jazbon ko munjamid raeganiyon ke supurd kar ke

ye soch lenge

ki hijr-emausam to wasl ki pahli sham se hi

safar ka aaghaz kar chuka tha