uDne wale phul

aao dikhlā.eñ uḌne vaale phuul

is chaman meñ haiñ ye nirāle phuul

koī sabz aur koī gulābī hai

ātishī koī koī aabī hai

koī niilā hai aur koī piilā

jis ko dekho ġhazab kā rangīlā

chhiḌkī qudrat ne in par afshāñ hai

aañkh san.at pe in kī hairāñ hai

pattiyāñ do haiñ kā.enāt in kī

had se baḌh kar magar sifāt in kī

ghaas par dekho in kī ārā.ish

kaisī hai dil-fareb zebā.ish

narm nāzuk hare bhare tinke

jhuke jaate haiñ bojh se in ke

dekhnā tum na baḌhā denā haath

kahīñ in ko lagā na denā haath

yaañ se kar jā.eñge abhī parvāz

in kī hastī kā hogā ifshā raaz

shaad ho kar havā meñ kheleñge

is chaman kī fazā meñ kheleñge

ḳhuub aTkheliyāñ kareñge ye

naaz se shoḳhiyāñ kareñge ye

phuul samjhe hue the ham jin ko

log kahte haiñ titliyāñ in ko

aao dikhlaen uDne wale phul

is chaman mein hain ye nirale phul

koi sabz aur koi gulabi hai

aatishi koi koi aabi hai

koi nila hai aur koi pila

jis ko dekho ghazab ka rangila

chhiDki qudrat ne in par afshan hai

aankh sanat pe in ki hairan hai

pattiyan do hain kaenat in ki

had se baDh kar magar sifat in ki

ghas par dekho in ki aaraish

kaisi hai dil-fareb zebaish

narm nazuk hare bhare tinke

jhuke jate hain bojh se in ke

dekhna tum na baDha dena hath

kahin in ko laga na dena hath

yan se kar jaenge abhi parwaz

in ki hasti ka hoga ifsha raaz

shad ho kar hawa mein khelenge

is chaman ki faza mein khelenge

KHub aTkheliyan karenge ye

naz se shoKHiyan karenge ye

phul samjhe hue the hum jin ko

log kahte hain titliyan in ko