ufuq-dar-ufuq

simaTte phailte paiham sulagte aur dhuñdlāte

ufuq jab pai-ba-pai ubhreñ ufuq jab pai-ba-pai Dūbeñ

to apnā kaam kyā hai naav apnī khete rahnā hai

ufuq mehrāb-dar-mehrāb apne dvaar phailā.e

ta.āqub ke ishāre barq ban kar kauñd jaate haiñ

badal jaatī haiñ rāheñ dūriyāñ baḌhtī hī rahtī haiñ

kabhī be-kārvāñ be-mash.al-o-shor-e-jaras chalnā

qayāmat hī sahī phir bhī hameñ chalnā hī paḌtā hai

ki chalnā hai muqaddar saath rahnā ik ināyat hai

jise bin māñge dete aur le lete haiñ bin pūchhe

zarā sī baat lekin ābgīne TuuT jaate haiñ

zarā sī baat pahroñ dil dikhātī hai satātī hai

taġhāful go bhalā lagtā hai phir bhī jī to jaltā hai

havā-e-intishār ik pal meñ tartībeñ zamānoñ kī

ulaT detī hai kaise aur qazā-o-qadr ke hāthoñ

yaqīñ ke jagmagāte muskurāte sūrajoñ se pur

ufuq gard-o-gubār-e-rāh ban kar Duub jaate haiñ

vo dekho po phaTī añdhiyāre jādoñ ke shagāfoñ se

ham is ko marhamat kā naam dete haiñ har ik shikva

yahāñ aa kar pashemāñ hone vāloñ ko manātā hai

alāvoñ ke qarīñ baiThe hue kitnī ḳhunuk shāmeñ

guzar jaatī haiñ jaise ḳhvāb guzre dil taḌaptā hai

ki shāmeñ shaboñ meñ aur shabeñ ujle saveroñ ke

tasalsul meñ guñdhī tūl-e-abad umr-e-ḳhizar pātīñ

magar ye dā.era-dar-dā.era sachchā.iyāñ tauba

hamesha raah meñ aatī raheñ tanhā.iyāñ dene

agar un kā lahū jam jaa.e apnī āstīnoñ par

to bujh jaa.eñ ye sho.ale jāvedāñ raushan alāvoñ ke

ufuq ke naqsh aur apnī shabīheñ sab hī miT jaa.eñ

asāsa rahguzāroñ kā thakan avval thakan āḳhir

nazāre chashm-e-bīnā meñ jo aañsū ban ke rahte haiñ

kasak jin kī chhupā.e se nahīñ chhuptī vo sab kāñTe

alāvoñ ke qarīñ aksar junūn-e-ḳhud-numā.ī meñ

kisī ik giit meñ ik dāstāñ meñ Dhalne lagte haiñ

ye ġham kitnā ġhanīmat hai ye ġham-e-hastī kī qīmat hai

ki ham is ko sunāne aur sunñe meñ bahal jaa.eñ

ufuq ke us taraf aur is taraf bikhrā huā imkāñ

jise hamrāh kahte the vo ik sapnā thā saudā thā

navā-e-nā-shunīda ke saveroñ tak pahuñchne kā

abad-āshām tanhā.ī kī vaadī paar karne kā

alāvoñ ke qarīñ aane kā ik pyārā bahāna thā

vo raqs-e-nik.hat-e-gul thā ki gardish meñ zamāna thā

simaTte phailte paiham sulagte aur dhundlate

ufuq jab pai-ba-pai ubhren ufuq jab pai-ba-pai Duben

to apna kaam kya hai naw apni khete rahna hai

ufuq mehrab-dar-mehrab apne dwar phailae

taaqub ke ishaare barq ban kar kaund jate hain

badal jati hain rahen duriyan baDhti hi rahti hain

kabhi be-karwan be-mashal-o-shor-e-jaras chalna

qayamat hi sahi phir bhi hamein chalna hi paDta hai

ki chalna hai muqaddar sath rahna ek inayat hai

jise bin mange dete aur le lete hain bin puchhe

zara si baat lekin aabgine TuT jate hain

zara si baat pahron dil dikhati hai satati hai

taghaful go bhala lagta hai phir bhi ji to jalta hai

hawa-e-intishaar ek pal mein tartiben zamanon ki

ulaT deti hai kaise aur qaza-o-qadr ke hathon

yaqin ke jagmagate muskuraate surajon se pur

ufuq gard-o-gubar-e-rah ban kar Dub jate hain

wo dekho po phaTi andhiyare jadon ke shagafon se

hum is ko marhamat ka nam dete hain har ek shikwa

yahan aa kar pasheman hone walon ko manata hai

alawon ke qarin baiThe hue kitni KHunuk shamen

guzar jati hain jaise KHwab guzre dil taDapta hai

ki shamen shabon mein aur shaben ujle saweron ke

tasalsul mein gundhi tul-e-abad umr-e-KHizar patin

magar ye daera-dar-daera sachchaiyan tauba

hamesha rah mein aati rahen tanhaiyan dene

agar un ka lahu jam jae apni aastinon par

to bujh jaen ye shoale jawedan raushan alawon ke

ufuq ke naqsh aur apni shabihen sab hi miT jaen

asasa rahguzaron ka thakan awwal thakan aaKHir

nazare chashm-e-bina mein jo aansu ban ke rahte hain

kasak jin ki chhupae se nahin chhupti wo sab kanTe

alawon ke qarin aksar junun-e-KHud-numai mein

kisi ek git mein ek dastan mein Dhalne lagte hain

ye gham kitna ghanimat hai ye gham-e-hasti ki qimat hai

ki hum is ko sunane aur sunne mein bahal jaen

ufuq ke us taraf aur is taraf bikhra hua imkan

jise hamrah kahte the wo ek sapna tha sauda tha

nawa-e-na-shunida ke saweron tak pahunchne ka

abad-asham tanhai ki wadi par karne ka

alawon ke qarin aane ka ek pyara bahana tha

wo raqs-e-nikhat-e-gul tha ki gardish mein zamana tha