ujala

merī hamdam, mire ḳhvāboñ kī sunahrī ta.abīr

muskurā de ki mire ghar meñ ujālā ho jaa.e

aañkh malte hue uTh jaa.e kiran bistar se

sub.h kā vaqt zarā aur suhānā ho jaa.e

mere nikhre hue gītoñ meñ tirā jaadū hai

maiñ ne meyār-e-tasavvur se banāyā hai tujhe

merī parvīn-e-taḳhayyul, mirī nasrīn-e-nigāh

maiñ ne taqdīs ke phūloñ se sajāyā hai tujhe

duudh kī tarah kuñvārī thī zamistāñ kī vo raat

jab tire shabnamī aariz ne dahaknā sīkhā

niiñd ke saa.e meñ har phuul ne añgḌā.ī lī

narm kaliyoñ ne tire dam se chaTaknā sīkhā

merī taḳh.īl kī jhankār ko sākit pā kar!

chūḌiyāñ terī kalā.ī meñ khanak uThtī thiiñ

uf mirī tishna-labī tishna-labī tishna-labī!

kachchī kaliyāñ tire hoñToñ kī mahak uThtī thiiñ

vaqt ke dast-e-girāñ-bār se māyūs na ho

kis ko ma.alūm hai kyā honā hai aur kyā ho jaa.e

merī hamdam, mire ḳhvāboñ kī sunahrī ta.abīr

muskurā de ki mire ghar meñ ujālā ho jaa.e

meri hamdam, mere KHwabon ki sunahri tabir

muskura de ki mere ghar mein ujala ho jae

aankh malte hue uTh jae kiran bistar se

subh ka waqt zara aur suhana ho jae

mere nikhre hue giton mein tera jadu hai

main ne meyar-e-tasawwur se banaya hai tujhe

meri parwin-e-taKHayyul, meri nasrin-e-nigah

main ne taqdis ke phulon se sajaya hai tujhe

dudh ki tarah kunwari thi zamistan ki wo raat

jab tere shabnami aariz ne dahakna sikha

nind ke sae mein har phul ne angDai li

narm kaliyon ne tere dam se chaTakna sikha

meri taKHil ki jhankar ko sakit pa kar!

chuDiyan teri kalai mein khanak uThti thin

uf meri tishna-labi tishna-labi tishna-labi!

kachchi kaliyan tere honTon ki mahak uThti thin

waqt ke dast-e-giran-bar se mayus na ho

kis ko malum hai kya hona hai aur kya ho jae

meri hamdam, mere KHwabon ki sunahri tabir

muskura de ki mere ghar mein ujala ho jae