ujli KHushbu

soch ke lamhe pyaar ke qisse muddat pahle

maiñ ne tum ne

basar kiye the

kal kī baat ye kyoñ lagtī hai

ab tak yaad hai sab kuchh mujh ko

āñkhoñ par hāthoñ ko rakh kar qasmeñ khāyā kartī

tujh ko dekhā jis sūrat meñ

ġhair na dekhūñgī

añdhiyāre meñ raushan saayā

Daalī ban ke lahrātī rang sameTe aatī

merā shāna terī shāmeñ

saare gaañv meñ ek diyā thā

jis kī oT meñ donoñ saa.e

baḌhte rahte

yaad hai mujh ko karmū baabā

zinda thā

sīḌhī uThā.e

tel kā Dibbā māñgī māchis

us ko dekh ke kahtā

shām-o-sahar hai karmū baabā

yaad hai tujh ko

kitne gharoñ meñ ghire do ghar the

kachche kachche

aur vo khambā jis ke nīche gaañv vaale māchā bichhā.e

chausar jamtī qahqahe lagte

sab se chorī tū ne maiñ ne kitne

rangīñ sapne bune the

vo lamha bhī yaad hai mujh ko karmū baabā sīḌhī uThā.e

saath ke gaañv chalā gayā

us din kitnī ḳhush thī

galī hai raushan

terā saayā merā saaya phail gayā

gaañv kī sachchī dīvāroñ ne muñh khole palaT ke tū ne dekhā

tire laboñ par chhāp lagī

chīḳh rahī thī

pakḌo us ko patthar maaro

rang do māthā kyoñ phirtā hai

merā pīchhā kartā hai

zehn kā iisā bantā hai

soch rahā huuñ terī bastī kyoñ aaya huuñ

ab bhī khambā vahīñ hai lekin

shahr meñ koī diyā nahīñ hai

soch ke lamhe pyar ke qisse muddat pahle

main ne tum ne

basar kiye the

kal ki baat ye kyon lagti hai

ab tak yaad hai sab kuchh mujh ko

aankhon par hathon ko rakh kar qasmen khaya karti

tujh ko dekha jis surat mein

ghair na dekhungi

andhiyare mein raushan saya

Dali ban ke lahraati rang sameTe aati

mera shana teri shamen

sare ganw mein ek diya tha

jis ki oT mein donon sae

baDhte rahte

yaad hai mujh ko karmu baba

zinda tha

siDhi uThae

tel ka Dibba mangi machis

us ko dekh ke kahta

sham-o-sahar hai karmu baba

yaad hai tujh ko

kitne gharon mein ghire do ghar the

kachche kachche

aur wo khamba jis ke niche ganw wale macha bichhae

chausar jamti qahqahe lagte

sab se chori tu ne main ne kitne

rangin sapne bune the

wo lamha bhi yaad hai mujh ko karmu baba siDhi uThae

sath ke ganw chala gaya

us din kitni KHush thi

gali hai raushan

tera saya mera saya phail gaya

ganw ki sachchi diwaron ne munh khole palaT ke tu ne dekha

tere labon par chhap lagi

chiKH rahi thi

pakDo us ko patthar maro

rang do matha kyon phirta hai

mera pichha karta hai

zehn ka isa banta hai

soch raha hun teri basti kyon aaya hun

ab bhi khamba wahin hai lekin

shahr mein koi diya nahin hai