ukhaDte KHemon ka dard

kahīñ bhī jā-e-amāñ nahīñ hai

na raushnī meñ na tīrgī meñ

na zindagī meñ na ḳhud-kushī meñ

aqīde zaḳhmoñ se chuur paiham karāhte haiñ

yaqīn kī saañs ukhaḌ chalī hai

jamīl ḳhvāboñ ke chehra-e-ġham-zada se nāsūr ris rahā hai

aziiz qadroñ pe jāñ-kanī kī giraft mazbūt ho ga.ī hai

patañg kī tarah kaT chuke haiñ tamām rishte

jo aadmī ko qarīb karte the aadmī se

diloñ meñ qaus-e-quzah kī añgḌā.iyāñ jin se TūTtī thiiñ

na fard hī kā makāñ salāmat

na ijtimā.ī vajūd hī zer sā.ebāñ hai

koī ḳhudā thā to vo kahāñ hai?

koī ḳhudā hai to vo kahāñ hai?

muhīb tūfāñ muhīb-tar hai

pahāḌ tak ret kī tarah uḌ rahe haiñ

bas ek āvāz gūñjtī hai

''mujhe bachāo mujhe bachāo''

magar kahīñ bhī amaañ nahīñ hai

jo apnī kashtī pe bach rahegā

vahī alaihissalām hogā

kahin bhi ja-e-aman nahin hai

na raushni mein na tirgi mein

na zindagi mein na KHud-kushi mein

aqide zaKHmon se chur paiham karahte hain

yaqin ki sans ukhaD chali hai

jamil KHwabon ke chehra-e-gham-zada se nasur ris raha hai

aziz qadron pe jaan-kani ki giraft mazbut ho gai hai

patang ki tarah kaT chuke hain tamam rishte

jo aadmi ko qarib karte the aadmi se

dilon mein qaus-e-quzah ki angDaiyan jin se TuTti thin

na fard hi ka makan salamat

na ijtimai wajud hi zer saeban hai

koi KHuda tha to wo kahan hai?

koi KHuda hai to wo kahan hai?

muhib tufan muhib-tar hai

pahaD tak ret ki tarah uD rahe hain

bas ek aawaz gunjti hai

mujhe bachao mujhe bachao

magar kahin bhi aman nahin hai

jo apni kashti pe bach rahega

wahi alaihissalam hoga