uljhan

karoḌoñ chehre

aur un ke pīchhe

karoḌoñ chehre

ye rāste haiñ ki bhiḌ ke chhatte

zamīn jismoñ se Dhak ga.ī hai

qadam to kyā til bhī dharne kī ab jagah nahīñ hai

ye dekhtā huuñ to sochtā huuñ

ki ab jahāñ huuñ

vahīñ simaT ke khaḌā rahūñ maiñ

magar karūñ kyā

ki jāntā huuñ

ki ruk gayā to

jo bhiiḌ pīchhe se aa rahī hai

vo mujh ko pairoñ tale kuchal degī piis degī

to ab jo chaltā huuñ maiñ

to ḳhud mere apne pairoñ meñ aa rahā hai

kisī kā siina

kisī kā baazū

kisī kā chehra

chalūñ

to auroñ pe zulm Dhā.ūñ

rukūñ

to auroñ ke zulm jhelūñ

zamīr

tujh ko to naaz hai apnī munsifī par

zarā sunūñ to

ki aaj kyā terā faisla hai

karoDon chehre

aur un ke pichhe

karoDon chehre

ye raste hain ki bhiD ke chhatte

zamin jismon se Dhak gai hai

qadam to kya til bhi dharne ki ab jagah nahin hai

ye dekhta hun to sochta hun

ki ab jahan hun

wahin simaT ke khaDa rahun main

magar karun kya

ki jaanta hun

ki ruk gaya to

jo bhiD pichhe se aa rahi hai

wo mujh ko pairon tale kuchal degi pis degi

to ab jo chalta hun main

to KHud mere apne pairon mein aa raha hai

kisi ka sina

kisi ka bazu

kisi ka chehra

chalun

to auron pe zulm Dhaun

rukun

to auron ke zulm jhelun

zamir

tujh ko to naz hai apni munsifi par

zara sunun to

ki aaj kya tera faisla hai