uljhanen

aadmī aaj bhī sad-haif ki insān nahīñ

aisī uljhan hai sulajhne kā kuchh imkān nahīñ

kaif kyā jiine meñ jab kaif ke sāmān nahīñ

zindagī meñ koī naġhma nahīñ rūmān nahīñ

aaj bhī jism ke ambār haiñ bāzāroñ meñ

zar-parastī kī adā 'aam hai dil-dāroñ meñ

khankhanāte hue sikkoñ kā tarannum hai 'azīz

ġhair se ġhair-hijābāna takallum hai 'azīz

chaar paisoñ ke liye uf ye talātum hai 'azīz

aaj bhī jism ke ambār haiñ bāzāroñ meñ

ḳhvāja-e-shahr hai yūsuf ke ḳharīdāroñ meñ

ufuq-e-dil pe mohabbat kī ghaTā.eñ na rahīñ

‘ishq-o-iḳhlās kī pākīza fazā.eñ na rahīñ

ab vo sahrā na rahe aur vo havā.eñ na rahīñ

qissa-e-qais to baaqī hai vafā.eñ na rahīñ

aaj bhī jism ke ambār haiñ bāzāroñ meñ

kaash aa jaa.e masīhā koī bīmāroñ meñ

aadmi aaj bhi sad-haif ki insan nahin

aisi uljhan hai sulajhne ka kuchh imkan nahin

kaif kya jine mein jab kaif ke saman nahin

zindagi mein koi naghma nahin ruman nahin

aaj bhi jism ke ambar hain bazaron mein

zar-parasti ki ada 'am hai dil-daron mein

khankhanate hue sikkon ka tarannum hai 'aziz

ghair se ghair-hijabana takallum hai 'aziz

chaar paison ke liye uf ye talatum hai 'aziz

aaj bhi jism ke ambar hain bazaron mein

KHwaja-e-shahr hai yusuf ke KHaridaron mein

ufuq-e-dil pe mohabbat ki ghaTaen na rahin

‘ishq-o-iKHlas ki pakiza fazaen na rahin

ab wo sahra na rahe aur wo hawaen na rahin

qissa-e-qais to baqi hai wafaen na rahin

aaj bhi jism ke ambar hain bazaron mein

kash aa jae masiha koi bimaron mein