الجھنیں

آدمی آج بھی صد حیف کہ انسان نہیں

ایسی الجھن ہے سلجھنے کا کچھ امکان نہیں

کیف کیا جینے میں جب کیف کے سامان نہیں

زندگی میں کوئی نغمہ نہیں رومان نہیں

آج بھی جسم کے انبار ہیں بازاروں میں

زر پرستی کی ادا عام ہے دل داروں میں

کھنکھاتے ہوئے سکوں کا ترنم ہے عزیز

غیر سے غیر حجابانہ تکلم ہے عزیز

چار پیسوں کے لیے اف یہ تلاطم ہے عزیز

آج بھی جسم کے انبار ہیں بازاروں میں

خواجۂ شہر ہے یوسف کے خریداروں میں

افق دل پہ محبت کی گھٹائیں نہ رہیں

عشق و اخلاص کی پاکیزہ فضائیں نہ رہیں

اب وہ صحرا نہ رہے اور وہ ہوائیں نہ رہیں

قصۂ قیس تو باقی ہے وفائیں نہ رہیں

آج بھی جسم کے انبار ہیں بازاروں میں

کاش آ جائے مسیحا کوئی بیماروں میں