uljhi sansen

us ne likhā thā kisī ko

mire bachche

ḳhāk-e-zar-gar meñ chhupe zarre haiñ

jin ko maiñ jaañ ke evaz sauñp rahī huuñ tum ko

mujh ko kuchh zinda khilaunoñ se mohabbat thī

jaise ainī kisī ham-sāya sahelī

ke khilaunoñ ko uThā laatī hai

aur so jaatī hai

siina se lagā kar un ko

daaġh jo ruuh meñ

jism pe hote to mujhe

log ik jaltā huā shahr samajhte

maiñ raakh maiñ kyā DhūñDhtā huuñ

to ne jalte hue dekhā thā use

daaġh the jism pe us ke jaise

tez jaltā huā mom

sham.a ke jism pe jam jaatā hai

jal bujhī

jal bujhī aur mujhe phūñk ga.ī

rishte uljhī huī sāñseñ haiñ magar

us kī sāñseñ to kisī aur kā sarmāya thiiñ

us ke jalne se mirī raakh kā rishta kyā thā

mujh ko ḳhvāboñ ne kabhī chain se sone na diyā

us ke hoñToñ ne jagāyā thā mirī āñkhoñ ko

daaġh bosoñ ke

laboñ par nahīñ rahte

lekin

ruuh par zaḳhm se ban jaate haiñ

to judā ho ga.ī jalte hue hoñToñ kī tarah

ye mirā ḳhat tujhe ik bosa-e-nādīda hai

us ne likha tha kisi ko

mere bachche

KHak-e-zar-gar mein chhupe zarre hain

jin ko main jaan ke ewaz saunp rahi hun tum ko

mujh ko kuchh zinda khilaunon se mohabbat thi

jaise aini kisi ham-saya saheli

ke khilaunon ko uTha lati hai

aur so jati hai

sina se laga kar un ko

dagh jo ruh mein

jism pe hote to mujhe

log ek jalta hua shahr samajhte

main rakh main kya DhunDhta hun

to ne jalte hue dekha tha use

dagh the jism pe us ke jaise

tez jalta hua mom

shama ke jism pe jam jata hai

jal bujhi

jal bujhi aur mujhe phunk gai

rishte uljhi hui sansen hain magar

us ki sansen to kisi aur ka sarmaya thin

us ke jalne se meri rakh ka rishta kya tha

mujh ko KHwabon ne kabhi chain se sone na diya

us ke honTon ne jagaya tha meri aankhon ko

dagh boson ke

labon par nahin rahte

lekin

ruh par zaKHm se ban jate hain

to juda ho gai jalte hue honTon ki tarah

ye mera KHat tujhe ek bosa-e-nadida hai