ummid-e-farda

ham ne lākhoñ sher kahe haiñ

sadiyoñ se aur qarnoñ se

in meñ ham ne insānoñ ko ulfat kā paiġhām diyā

giit mohabbat ke gaa.e

bhā.ī-chāre kā dars diyā

mānavtā kā sabaq diyā saare vahshī insānoñ ko

giit hamāre bhaTak rahe haiñ nafrat ke sahrāoñ meñ

laash paḌī hai mānavtā kī duniyā ke chaurāhe par

tahzīb ke aivānoñ meñ har-sū shor bapā hai mātam kā

nangī ho kar naach rahī hai barbariyat kāshānoñ meñ

ek na.ī duniyā ke sapne dekh rahe haiñ sadiyoñ se

aisī duniyā jis meñ kisī ko koī ġham-o-ālām na hoñ

aas ke har-sū phuul khileñ aur paas kā koī ḳhaar na ho

mīThī mīThī dhuup ho phailī chāroñ or umīdoñ kī

sukhoñ kī har-sū bārish ho dukhoñ kā koī sailāb na ho

lekin ham ye dekh rahe haiñ

ḳhvāb hamāre TuuT rahe haiñ

paas kī tārīkī ab har-sū gahrī hotī jaatī hai

rang milā jaatā hai lahū kā ab apne in sapnoñ meñ

soch rahe haiñ sheroñ kā likhnā ham kyoñ na band kareñ

gītoñ ko uljhā.eñ kab tak nā-fahmī ke ḳhāroñ meñ

in ke komal badanoñ ko kyoñ Takrā.eñ chaTTānoñ se

ham to ye soch rahe haiñ qarnoñ tak ḳhāmosh raheñ

aisī sadāoñ se hāsil kyā jo ho kar āvāra bhaTkeñ

Takrā kar chāroñ samtoñ se lauTeñ zaḳhmī ho ho kar

zehn hamāre ghire hue haiñ yaas kī gahrī tārīkī meñ

duur duur tak tārīkī hai māyūsī kī tārīkī

duur duur tak ḳhuun ke dariyā

duur duur tak lāsheñ haiñ

lāsheñ apnī ummīdoñ kī

lāsheñ apne ḳhvāboñ kī

lāsheñ un ādarshoñ kī

jin kī ham ne puujā kī hai sadiyoñ se

phir bhī jinheñ apnā na sake ham

lauh-o-qalam bhī Duub chuke haiñ aisī hī tārīkī meñ

un kī āñkheñ chiir rahī haiñ siina is tārīkī kā

dekh rahī haiñ us duniyā ko jo is tārīkī se pare hai

us duniyā ko jis ke sapne ham dekh rahe haiñ sadiyoñ se

dil apne māyūs haiñ lekin lauh-o-qalam māyūs nahīñ

hum ne lakhon sher kahe hain

sadiyon se aur qarnon se

in mein hum ne insanon ko ulfat ka paigham diya

git mohabbat ke gae

bhai-chaare ka dars diya

manawta ka sabaq diya sare wahshi insanon ko

git hamare bhaTak rahe hain nafrat ke sahraon mein

lash paDi hai manawta ki duniya ke chaurahe par

tahzib ke aiwanon mein har-su shor bapa hai matam ka

nangi ho kar nach rahi hai barbariyat kashanon mein

ek nai duniya ke sapne dekh rahe hain sadiyon se

aisi duniya jis mein kisi ko koi gham-o-alam na hon

aas ke har-su phul khilen aur pas ka koi KHar na ho

miThi miThi dhup ho phaili chaaron or umidon ki

sukhon ki har-su barish ho dukhon ka koi sailab na ho

lekin hum ye dekh rahe hain

KHwab hamare TuT rahe hain

pas ki tariki ab har-su gahri hoti jati hai

rang mila jata hai lahu ka ab apne in sapnon mein

soch rahe hain sheron ka likhna hum kyon na band karen

giton ko uljhaen kab tak na-fahmi ke KHaron mein

in ke komal badanon ko kyon Takraen chaTTanon se

hum to ye soch rahe hain qarnon tak KHamosh rahen

aisi sadaon se hasil kya jo ho kar aawara bhaTken

Takra kar chaaron samton se lauTen zaKHmi ho ho kar

zehn hamare ghire hue hain yas ki gahri tariki mein

dur dur tak tariki hai mayusi ki tariki

dur dur tak KHun ke dariya

dur dur tak lashen hain

lashen apni ummidon ki

lashen apne KHwabon ki

lashen un aadarshon ki

jin ki hum ne puja ki hai sadiyon se

phir bhi jinhen apna na sake hum

lauh-o-qalam bhi Dub chuke hain aisi hi tariki mein

un ki aankhen chir rahi hain sina is tariki ka

dekh rahi hain us duniya ko jo is tariki se pare hai

us duniya ko jis ke sapne hum dekh rahe hain sadiyon se

dil apne mayus hain lekin lauh-o-qalam mayus nahin