ummid

parsoñ ne kal ko paalā thā

parvān chaḌhāyā kal ne aaj

aur aaj kī kokh se fardā janm le rahā hai

jaise zamīn ne sūraj se zindagī paa.ī thī

aur chāñd ko zamīn se rizq pahuñch rahā hai

sūraj zamīn kā maazī aur chāñd us kā mustaqbil hai

jaise jamādāt se nabātāt se haivānāt ke ba.ad insān paidā ho gayā

to zindagī kā safar yahāñ pahuñch kar ruk jā.egā kyā

kyā nietzsche kā insān-e-bālā ''ba-qaul-e-zardshut'' ke aurāq hī meñ dafn ho kar rah jā.egā

kyā iqbāl kā shāhīn qasr-e-sultānī ke gumbad hī meñ baserā kar legā

kyā qur.ān ke mutābiq insān kā muntahā ḳhudā nahīñ

to kyā ham ḳhudā kī jānib mahv-e-safar haiñ

aur jab ham ḳhudā tak pahuñch jā.eñge to kyā zindagī kā safar ḳhatm ho jā.egā

aur kyā is maqām par vaqt tham jā.egā tārīḳh tamām ho jā.egī

yā vahāñ se ek aur jahān shurūa hogā

ek nayā aalam ek na.ī zindagī

ek nayā ḳhudā?

vaise agar ḳhudā hī ibtidā aur ḳhudā hī intihā hai

to kyā ibtidā aur intihā kī taḳhsīs be-ma.anī nahīñ

jaise jab dā.era mukammal ho jaa.e to us kī ibtidā aur intihā donoñ miT jaatī haiñ

to kyā haqīqat ek kāmil dā.era hai ibtidā aur intihā ke baġhair

agar aisā hai to harkat kahāñ se aa.ī

kahīñ ye dā.era phailtā aur sikuḌtā to nahīñ rahtā

kyā vaqt kā ruḳh maazī se haal se mustaqbil kī jānib hī rahtā hai

yā mustaqbil se haal se maazī kī taraf bhī ho saktā hai

kyā insān se haivānāt se nabātāt se jamādāt ko lauTnā bhī mumkin hai

aur kyā ab aisā hī to nahīñ ho rahā

zāhir hai insān par ḳhudā kā rañg to chaḌh nahīñ rahā

albatta haivānī sifāt ne zarūr ghar kar liyā hai is meñ

shahr-e-insān se shahr-e-ḳhudā kī jānib to ham jā nahīñ rahe

kahīñ ham qadam-ba-qadam jañgal kī taraf to nahīñ palaT rahe

kyā hamārī māzī-parastī hameñ

haivānāt se nabātāt se jamādāt tak to nahīñ le jā.egī

kyā ham pīchhe muḌ kar dekhne ke jurm meñ patthar ke ho kar to nahīñ rah jā.eñge

lekin kahte haiñ ki nā-umīd nahīñ honā chāhiye ki nā-umīdī kufr hai

āḳhir jamādāt se pahle bhī to kuchh maujūd hogā

bha.ī, ḳhudā to thā us vaqt bhī

aur agar ḳhudā hī hamārā muntahā hai

to aage baḌh kar na sahī

pīchhe muḌ kar sahī

ham use pā hī leñge

bas īmān mazbūt honā chāhiye

''fanā'' ''baqā'' aur ''laqā'' kī manzileñ zarūr ā.eñgī

ham pur-ummīd haiñ

parson ne kal ko pala tha

parwan chaDhaya kal ne aaj

aur aaj ki kokh se farda janm le raha hai

jaise zamin ne suraj se zindagi pai thi

aur chand ko zamin se rizq pahunch raha hai

suraj zamin ka mazi aur chand us ka mustaqbil hai

jaise jamadat se nabaatat se haiwanat ke baad insan paida ho gaya

to zindagi ka safar yahan pahunch kar ruk jaega kya

kya nietzsche ka insan-e-baala ba-qaul-e-zardshut ke auraq hi mein dafn ho kar rah jaega

kya iqbaal ka shahin qasr-e-sultani ke gumbad hi mein basera kar lega

kya quran ke mutabiq insan ka muntaha KHuda nahin

to kya hum KHuda ki jaanib mahw-e-safar hain

aur jab hum KHuda tak pahunch jaenge to kya zindagi ka safar KHatm ho jaega

aur kya is maqam par waqt tham jaega tariKH tamam ho jaegi

ya wahan se ek aur jahan shurua hoga

ek naya aalam ek nai zindagi

ek naya KHuda?

waise agar KHuda hi ibtida aur KHuda hi intiha hai

to kya ibtida aur intiha ki taKHsis be-mani nahin

jaise jab daera mukammal ho jae to us ki ibtida aur intiha donon miT jati hain

to kya haqiqat ek kaamil daera hai ibtida aur intiha ke baghair

agar aisa hai to harkat kahan se aai

kahin ye daera phailta aur sikuDta to nahin rahta

kya waqt ka ruKH mazi se haal se mustaqbil ki jaanib hi rahta hai

ya mustaqbil se haal se mazi ki taraf bhi ho sakta hai

kya insan se haiwanat se nabaatat se jamadat ko lauTna bhi mumkin hai

aur kya ab aisa hi to nahin ho raha

zahir hai insan par KHuda ka rang to chaDh nahin raha

albatta haiwani sifat ne zarur ghar kar liya hai is mein

shahr-e-insan se shahr-e-KHuda ki jaanib to hum ja nahin rahe

kahin hum qadam-ba-qadam jangal ki taraf to nahin palaT rahe

kya hamari mazi-parasti hamein

haiwanat se nabaatat se jamadat tak to nahin le jaegi

kya hum pichhe muD kar dekhne ke jurm mein patthar ke ho kar to nahin rah jaenge

lekin kahte hain ki na-umid nahin hona chahiye ki na-umidi kufr hai

aaKHir jamadat se pahle bhi to kuchh maujud hoga

bhai, KHuda to tha us waqt bhi

aur agar KHuda hi hamara muntaha hai

to aage baDh kar na sahi

pichhe muD kar sahi

hum use pa hi lenge

bas iman mazbut hona chahiye

fana baqa aur laqa ki manzilen zarur aaengi

hum pur-ummid hain