ummid uljhan

duur āñkhoñ se bahut duur, kahīñ

ik tasavvur hai, jo be-zār kiye rakhtā hai

vo koī ḳhvāb hai yā ḳhvāb kā andesha hai

jo mire soch ko mismār kiye rakhtā hai

duur, qismat kī lakīroñ se bahut duur, kahīñ

ek chehra hai, tire chehre se miltā-jultā

jo mujhe niiñd meñ bedār kiye rakhtā hai

duur se, aur bahut daur kī āvāzoñ se

ek āvāz bulātī hai sar-e-shām mujhe

jāntā huuñ maiñ mohabbat kī haqīqat lekin

phir bhī āġhosh-e-tamannā meñ, taḌap uThtā huuñ

chehre chehre pe bikhartī huii, āvāzoñ meñ

terī āvāz se āvāz kahāñ miltī hai

ek qindīl ḳhayāloñ kī magar jaltī hai

tū mire paas, bahut paas, kahīñ rahtī hai

duur hai duur bahut duur, magar phir bhii, mujhe

ek ummīd sar-e-shām sajā rakhtī hai

ek uljhan mujhe rātoñ ko jagā rakhtī hai

dur aankhon se bahut dur, kahin

ek tasawwur hai, jo be-zar kiye rakhta hai

wo koi KHwab hai ya KHwab ka andesha hai

jo mere soch ko mismar kiye rakhta hai

dur, qismat ki lakiron se bahut dur, kahin

ek chehra hai, tere chehre se milta-julta

jo mujhe nind mein bedar kiye rakhta hai

dur se, aur bahut daur ki aawazon se

ek aawaz bulati hai sar-e-sham mujhe

jaanta hun main mohabbat ki haqiqat lekin

phir bhi aaghosh-e-tamanna mein, taDap uThta hun

chehre chehre pe bikharti hui, aawazon mein

teri aawaz se aawaz kahan milti hai

ek qindil KHayalon ki magar jalti hai

tu mere pas, bahut pas, kahin rahti hai

dur hai dur bahut dur, magar phir bhi, mujhe

ek ummid sar-e-sham saja rakhti hai

ek uljhan mujhe raaton ko jaga rakhti hai