unki taswir dekh kar

aaj kyā hai jo milā shoḳh nigāhoñ ko qarār?

kyā huā husn kī ma.asūm hayāoñ kā vaqār

aaj kyuuñ tum mujhe dekhe hī chale jaate ho?

daf.atan TuuT gayā kis liye bajtā huā saaz

kyā hue naġhme vo ab kyuuñ nahīñ aatī āvāz

aaj hoñToñ pe ḳhamoshī hī ḳhamoshī kyuuñ hai?

ḳhuub tadbīr nikālī hai manāne kī mujhe

ātish-e-soz-e-mohabbat meñ jalāne kī mujhe

bhole-bhāle ho to de do mire shikvoñ kā javāb

tum ne kyā peshtar apnā na banāyā mujh ko

phir yakāyak na nigāhoñ se girāyā mujh ko

ye agar jhuuT hai to muñh se kaho chup kyuuñ ho

tū ne ik dil ko mire dars-e-mohabbat na diyā

aur phir jaan ke dāġh-e-ġham-e-furqat na diyā

ye agar jhuuT hai to muñh se kaho, chup kyuuñ ho

tum ne kyā mujh se kisī qism kā va.ada na kiyā

ye agar jhuuT hai to muñh se kaho, chup kyuuñ ho?

de sake tum na mire ek bhī shikve kā javāb

ab maiñ samjhā ki hai kyā rāz-e-ba-dāmān-e-hijāb

vāqa.ī tum ko nadāmat hai jo ḳhāmosh ho tum

yā kisī parda-e-tasvīr meñ rū-posh ho tum!

aaj kya hai jo mila shoKH nigahon ko qarar?

kya hua husn ki masum hayaon ka waqar

aaj kyun tum mujhe dekhe hi chale jate ho?

dafatan TuT gaya kis liye bajta hua saz

kya hue naghme wo ab kyun nahin aati aawaz

aaj honTon pe KHamoshi hi KHamoshi kyun hai?

KHub tadbir nikali hai manane ki mujhe

aatish-e-soz-e-mohabbat mein jalane ki mujhe

bhole-bhaale ho to de do mere shikwon ka jawab

tum ne kya peshtar apna na banaya mujh ko

phir yakayak na nigahon se giraya mujh ko

ye agar jhuT hai to munh se kaho chup kyun ho

tu ne ek dil ko mere dars-e-mohabbat na diya

aur phir jaan ke dagh-e-gham-e-furqat na diya

ye agar jhuT hai to munh se kaho, chup kyun ho

tum ne kya mujh se kisi qism ka wada na kiya

ye agar jhuT hai to munh se kaho, chup kyun ho?

de sake tum na mere ek bhi shikwe ka jawab

ab main samjha ki hai kya raaz-e-ba-daman-e-hijab

waqai tum ko nadamat hai jo KHamosh ho tum

ya kisi parda-e-taswir mein ru-posh ho tum!