unhen DhunDo

unheñ DhūñDho safar kī shaam se pahle

kisī anjām se pahle

unheñ DhūñDo

jo milne kī ghaḌī meñ

ham se bichhḌe the

diloñ se phūTte is ġham se bichhḌe the

jo āñkheñ ḳhushk rakhtā hai

magar dahlīz-e-jāñ tak

pāniyoñ ko chhoḌ jaatā hai

jo rasta dil kī galiyoñ se nikaltā ho

usī raste kī har ik samt ko

vo moḌ jaatā hai

masarrat kī harī shāḳhoñ ko aa kar toḌ jaatā hai

unheñ DhūñDo

udāsī kī kitāboñ se

tamannā ke nisāboñ meñ likhī

tahrīr ke mafhūm se

jis meñ udāsī ne

ḳhud apnī bebasī kā baab likkhā thā

shu.ūr-e-zāt kā

dhundlā sā ik ehsās likkhā thā

unheñ DhūñDo

judā.ī kī galī meñ

lauT aane kā sandesa chhoḌ kar

ruḳhsat hue the jo

charāġhoñ ne jinheñ

is āḳhirī saa.at meñ dekhā thā

ki jab un kī laveñ bujhne lagī thiiñ

aur jab ḳhud meñ mukammal ho rahe the

unheñ DhūñDo jo āñkhoñ se

faqat ik ḳhvāb kī

duurī pe rahte haiñ

jinheñ āñkheñ

hazāroñ saal kī furqat ko

oḌhe DhūñDtī haiñ

hamesha jāgtī haiñ

unhen DhunDho safar ki sham se pahle

kisi anjam se pahle

unhen DhunDo

jo milne ki ghaDi mein

hum se bichhDe the

dilon se phuTte is gham se bichhDe the

jo aankhen KHushk rakhta hai

magar dahliz-e-jaan tak

paniyon ko chhoD jata hai

jo rasta dil ki galiyon se nikalta ho

usi raste ki har ek samt ko

wo moD jata hai

masarrat ki hari shaKHon ko aa kar toD jata hai

unhen DhunDo

udasi ki kitabon se

tamanna ke nisabon mein likhi

tahrir ke mafhum se

jis mein udasi ne

KHud apni bebasi ka bab likkha tha

shuur-e-zat ka

dhundla sa ek ehsas likkha tha

unhen DhunDo

judai ki gali mein

lauT aane ka sandesa chhoD kar

ruKHsat hue the jo

charaghon ne jinhen

is aaKHiri saat mein dekha tha

ki jab un ki lawen bujhne lagi thin

aur jab KHud mein mukammal ho rahe the

unhen DhunDo jo aankhon se

faqat ek KHwab ki

duri pe rahte hain

jinhen aankhen

hazaron sal ki furqat ko

oDhe DhunDti hain

hamesha jagti hain