unwan nadarad

ghanī tīrgī thī

basārat ko apne na hone kā yaksar yaqīñ ho chalā thā

ka.ī ġhair malfūz āvāzeñ vahshat meñ

Dhaltī chalī jā rahī thiiñ

yahāñ tak

ki har zī-nafas sāme.a ke na hone ko ne.amat kī sūrat talab kar rahā thā

magar jab

ufuq ke kināre se ik raushnī kā pharerā sā lapkā

kahīñ duur se terī āvāz aa.ī

to vahshat ke ma.anī badalne lage aur

ka.ī be-zabāñ hairateñ apne hone ke ehsās se

chīḳh uTThīñ yakāyak

magar aisī chīḳheñ ki jin ke batn meñ

na vahshat na dahshat

koī sarḳhushī thī

sarāsīmgī thī

zamīñ hairatī thī ki ye kaisī chīḳheñ

fazāoñ meñ ghultī chalī jā rahī haiñ

ḳhushī aur ġhamī ke ma.ānī ko yaksar badaltā huā raushnī kā pharerā

havā ke dabāo se lahrā rahā hai

ajab tīrgī thī

ajab raushnī thī

ajab shor thā aur

ajab ḳhāmushī thī

jo hone kī tah se na hone ke bhedoñ ko sochoñ ke sāhil talak lā rahī thī

ghani tirgi thi

basarat ko apne na hone ka yaksar yaqin ho chala tha

kai ghair malfuz aawazen wahshat mein

Dhalti chali ja rahi thin

yahan tak

ki har zi-nafas samea ke na hone ko neamat ki surat talab kar raha tha

magar jab

ufuq ke kinare se ek raushni ka pharera sa lapka

kahin dur se teri aawaz aai

to wahshat ke mani badalne lage aur

kai be-zaban hairaten apne hone ke ehsas se

chiKH uTThin yakayak

magar aisi chiKHen ki jin ke batn mein

na wahshat na dahshat

koi sarKHushi thi

sarasimgi thi

zamin hairati thi ki ye kaisi chiKHen

fazaon mein ghulti chali ja rahi hain

KHushi aur ghami ke maani ko yaksar badalta hua raushni ka pharera

hawa ke dabao se lahra raha hai

ajab tirgi thi

ajab raushni thi

ajab shor tha aur

ajab KHamushi thi

jo hone ki tah se na hone ke bhedon ko sochon ke sahil talak la rahi thi