اردو

ہے شہد سے بھی میٹھی اردو زباں ہماری

سچ پوچھئے تو یہ ہے تسکین جاں ہماری

دل کا سرور ہے یہ آنکھوں کا نور ہے یہ

اردو زباں کے ہم ہیں اردو زباں ہماری

ہندوستاں سے چل کر یورپ پہنچ گئی ہے

دنیا پہ چھا رہی ہے اردو زباں ہماری

ہم ہندیوں نے اس کو سو چوچلوں سے پالا

اردو ہے آج واحد قومی زباں ہماری

واحد ہو قوم اپنی واحد زبان اپنی

بے شک جبھی کرے گا عزت جہاں ہماری

جب تک جئیں گے خدمت اردو کی ہم کریں گے

اردو ہے زندگی کی روح و رواں ہماری

آسان اور شیریں دلچسپ اور پیاری

ہے ہر زباں سے بڑھ کر اردو زباں ہماری