urdu

hai shahad se bhī mīThī urdu zabāñ hamārī

sach pūchhiye to ye hai taskīn-e-jāñ hamārī

dil kā surūr hai ye āñkhoñ kā nuur hai ye

urdu zabāñ ke ham haiñ urdu zabāñ hamārī

hindostāñ se chal kar europe pahuñch ga.ī hai

duniyā pe chhā rahī hai urdu zabāñ hamārī

ham hindiyoñ ne is ko sau chochaloñ se paalā

urdu hai aaj vāhid qaumī zabāñ hamārī

vāhid ho qaum apnī vāhid zabān apnī

be-shak jabhī karegā izzat jahāñ hamārī

jab tak jiyeñge ḳhidmat urdu kī ham kareñge

urdu hai zindagī kī rūh-o-ravāñ hamārī

āsān aur shīrīñ dilchasp aur piyārī

hai har zabāñ se baḌh kar urdu zabāñ hamārī

hai shahad se bhi miThi urdu zaban hamari

sach puchhiye to ye hai taskin-e-jaan hamari

dil ka surur hai ye aankhon ka nur hai ye

urdu zaban ke hum hain urdu zaban hamari

hindostan se chal kar europe pahunch gai hai

duniya pe chha rahi hai urdu zaban hamari

hum hindiyon ne is ko sau chochalon se pala

urdu hai aaj wahid qaumi zaban hamari

wahid ho qaum apni wahid zaban apni

be-shak jabhi karega izzat jahan hamari

jab tak jiyenge KHidmat urdu ki hum karenge

urdu hai zindagi ki ruh-o-rawan hamari

aasan aur shirin dilchasp aur piyari

hai har zaban se baDh kar urdu zaban hamari