urdu

ḳhitta-e-arz pe kyā shaan hai terī urdu

tū mirī ziist kā armān hai merī urdu

tujh ko baḳhshā gayā duniyā meñ mua.allā kā ḳhitāb

tū vo jauhar hai ki terā nahīñ duniyā meñ javāb

gulshan-e-dahr meñ maujūd hai ḳhushbū kī tarah

tū hai sahrā-e-ḳhayālāt meñ aahū kī tarah

terī azmat koī 'ashraf' kī zabāñ se pūchhe

nafs-e-mazmūñ tirā 'ḳhusrav' ke bayāñ se pūchhe

yuuñ to kahne ko vatan hai tirā ye barr-e-saġhīr

magar ai lailā-e-jāñ terā har ik dil hai asiir

tujh pe nāzāñ thī qulī 'qutb' ke jazbāt kī rau

kabhī dillī to kabhī lakhna.ū pahuñchī tirī zau

tujh ko e.azāz-e-ajab shāhjahāñ ne baḳhshā

lutf-e-shā.istagī 'saudā' kī zabāñ ne baḳhshā

aa gayā dil meñ tire 'mīr-taqī-mīr' kā soz

de gayā dard kī lazzat tujhe 'dil-gīr' kā soz

'momin'-o-'zauq' ke afkār tujhe raas aa.e

zehn-e-'ġhālib' ke ḳhayālāt tire paas aa.e

aa gayā tere kaf-e-dast meñ aalam kā zamīr

kar ga.e tujh ko sar-afrāz 'anīs' aur 'dabīr'

'dāġh' ne tujh ko diye ishq ke andāz na.e

fikr-e-'iqbāl' se kyā kyā na mile raaz na.e

'josh' kī sho.ala-bayānī ne tujhe dī vus.at

'ārzū' kī hama-dānī ne tujhe dī vaq.at

kar gayā tujh ko buland 'āl-e-razā' kā uslūb

de gayā lahja-e-nau 'faiz' kā dhīmā uslūb

shādī-o-ġham meñ tujhe yaad kiyā karte haiñ

terī āvāz meñ fariyād kiyā karte haiñ

KHitta-e-arz pe kya shan hai teri urdu

tu meri zist ka arman hai meri urdu

tujh ko baKHsha gaya duniya mein mualla ka KHitab

tu wo jauhar hai ki tera nahin duniya mein jawab

gulshan-e-dahr mein maujud hai KHushbu ki tarah

tu hai sahra-e-KHayalat mein aahu ki tarah

teri azmat koi 'ashraf' ki zaban se puchhe

nafs-e-mazmun tera 'KHusraw' ke bayan se puchhe

yun to kahne ko watan hai tera ye barr-e-saghir

magar ai laila-e-jaan tera har ek dil hai asir

tujh pe nazan thi quli 'qutb' ke jazbaat ki rau

kabhi dilli to kabhi lakhnau pahunchi teri zau

tujh ko eazaz-e-ajab shahjahan ne baKHsha

lutf-e-shaistagi 'sauda' ki zaban ne baKHsha

aa gaya dil mein tere 'mir-taqi-mir' ka soz

de gaya dard ki lazzat tujhe 'dil-gir' ka soz

'momin'-o-'zauq' ke afkar tujhe ras aae

zehn-e-'ghaalib' ke KHayalat tere pas aae

aa gaya tere kaf-e-dast mein aalam ka zamir

kar gae tujh ko sar-afraaz 'anis' aur 'dabir'

'dagh' ne tujh ko diye ishq ke andaz nae

fikr-e-'iqbaal' se kya kya na mile raaz nae

'josh' ki shoala-bayani ne tujhe di wusat

'arzu' ki hama-dani ne tujhe di waqat

kar gaya tujh ko buland 'al-e-raza' ka uslub

de gaya lahja-e-nau 'faiz' ka dhima uslub

shadi-o-gham mein tujhe yaad kiya karte hain

teri aawaz mein fariyaad kiya karte hain