urdu

kitnī pyārī zabān hai urdu

mere bhārat kī shaan hai urdu

mulk meñ an-ginat haiñ bhāshā.eñ

sab zabānoñ kī jaan hai urdu

is meñ vus.at hai is meñ gahrā.ī

kitnā ūñchā maqām urdu kā

saarī duniyā ke lafz haiñ is meñ

jaise lashkar hai naam urdu kā

is ko paalā amiir ḳhusrav ne

is ne bhārat meñ aañkh kholī hai

merī urdu nahīñ hai bāhar kī

ye bhī bhārat kī ek bolī hai

ik valī ne ise sañbhālā hai

hai dakkan pāsbān urdu kā

is ke markaz the lucknow dehlī

ab hai saarā jahān urdu kā

mīr-o-ġhālib hue haiñ urdu ke

aur nasīm-o-firāq shaidā.ī

zauq-o-momin ne bhī sañvārā hai

saarī qaumoñ ne kī pazīrā.ī

'saudā' 'nāsiḳh' 'amīr' aur 'inshā'

'ārzū' 'dard' 'fānī' aur 'jalīl'

'yās' 'majrūh' aur alī 'sardār'

'dānish' aḳhtar adam hafīz-o-shakīl

daaġh iqbāl aur jigar hasrat

josh sīmāb kaifī aur majāz

ḳhuub shā.ir hue haiñ urdu ke

faiz sāhir qatīl aur farāz

is ko maz.hab se vāsta hī nahīñ

jis ne chāhā usī kī kahlā.ī

giit gaa.e haiñ is ke aashā ne

aur jagjīt ne ġhazal gaa.ī

kuchh kitābeñ ḳharīd urdu kī

apne bachchoñ ko bhī paḌhāo tum

un kī ta.alīm kā ḳhayāl rakho

un ko tahzīb bhī sikhāo tum

anjum bhī jānte haiñ ki pyārī zabān hai

urdu hai jis kā naam hamārī zabān hai

kitni pyari zaban hai urdu

mere bhaarat ki shan hai urdu

mulk mein an-ginat hain bhashaen

sab zabanon ki jaan hai urdu

is mein wusat hai is mein gahrai

kitna uncha maqam urdu ka

sari duniya ke lafz hain is mein

jaise lashkar hai nam urdu ka

is ko pala amir KHusraw ne

is ne bhaarat mein aankh kholi hai

meri urdu nahin hai bahar ki

ye bhi bhaarat ki ek boli hai

ek wali ne ise sanbhaala hai

hai dakkan pasban urdu ka

is ke markaz the lucknow dehli

ab hai sara jahan urdu ka

mir-o-ghaalib hue hain urdu ke

aur nasim-o-firaq shaidai

zauq-o-momin ne bhi sanwara hai

sari qaumon ne ki pazirai

'sauda' 'nasiKH' 'amir' aur 'insha'

'arzu' 'dard' 'fani' aur 'jalil'

'yas' 'majruh' aur ali 'sardar'

'danish' aKHtar adam hafiz-o-shakil

dagh iqbaal aur jigar hasrat

josh simab kaifi aur majaz

KHub shair hue hain urdu ke

faiz sahir qatil aur faraaz

is ko mazhab se wasta hi nahin

jis ne chaha usi ki kahlai

git gae hain is ke aasha ne

aur jagjit ne ghazal gai

kuchh kitaben KHarid urdu ki

apne bachchon ko bhi paDhao tum

un ki talim ka KHayal rakho

un ko tahzib bhi sikhao tum

anjum bhi jaante hain ki pyari zaban hai

urdu hai jis ka nam hamari zaban hai