اردو نظم

دل خواص ہے روح عوام ہے اردو

زباں نہیں ہے مکمل نظام ہے اردو

ہر اک مقام ہے دار الخلافۂ اردو

اور اس پہ لطف یہ ہے بے مقام ہے اردو

کمال حسن و فصاحت جمال نطق و بیاں

یہ مقتدی ہیں اور ان کی امام ہے اردو

غزل سرا ہے زمانہ حیات نغمہ کناں

وظیفۂ سحر و روز و شام ہے اردو

ہمارے شمس و قمر اس سے نور پاتے ہیں

سحر کی جوت تجلیٔ شام ہے اردو

ندیمؔ چاند پہ بھی خاک پڑ سکی ہے کبھی

سپہر عصر پہ ماہ تمام ہے اردو

ہے تلخ کامیٔ دشمن میں بھی اسی کا سرور

کوئی بتاؤ کہ کس جا حرام ہے اردو