urdu

jabīn-e-vaqt par kaisī shikan hai ham nahīñ samjhe

koī kyuuñ kar harīf-e-ilm-o-fan hai ham nahīñ samjhe

kisī bhī sham.a se be-zār kyuuñ ho koī parvāna

ye kyā is daur kā dīvāna-pan hai ham nahīñ samjhe

bahut samjhe the ham is daur kī firqa-parastī ko

zabāñ bhī aaj shaiḳh-o-barhaman hai ham nahīñ samjhe

agar urdu pe bhī ilzām hai bāhar se aane kā

to phir hindostāñ kis kā vatan hai ham nahīñ samjhe

chaman kā husn to har rang ke phūloñ se hai 'rāshid'

koī bhī phuul kyuuñ nañg-e-chaman hai ham nahīñ samjhe

jabin-e-waqt par kaisi shikan hai hum nahin samjhe

koi kyun kar harif-e-ilm-o-fan hai hum nahin samjhe

kisi bhi shama se be-zar kyun ho koi parwana

ye kya is daur ka diwana-pan hai hum nahin samjhe

bahut samjhe the hum is daur ki firqa-parasti ko

zaban bhi aaj shaiKH-o-barhaman hai hum nahin samjhe

agar urdu pe bhi ilzam hai bahar se aane ka

to phir hindostan kis ka watan hai hum nahin samjhe

chaman ka husn to har rang ke phulon se hai 'rashid'

koi bhi phul kyun nang-e-chaman hai hum nahin samjhe