urdu

ye pyārī urdu ki jis kā nahīñ hai koī badal

hasīn aisī hai jaise jamāl-e-tāj-mahal

har ek des-nivāsī ne paa.ī ye mīrās

vo raam ho ki karam singh ho yā ki mīr-ġhiyās

hai masjidoñ meñ muqaddas pavitra mandir meñ

har ik galī meñ chalan aur guzar hai har ghar meñ

vo jo ki bolte haiñ bhāñt bhāñt kī bolī

to suniye un se bhī urdu jam.a ho jab Tolī

kahīñ bhī jā.iye urdu zarūr pā.eñge

samajhne bolne vaale to mil hī jā.eñge

adab meñ sher meñ ūñchā maqām hai is kā

samāj ke sabhī shoboñ meñ naam hai is kā

zavāl is ko kabhī aa.e ġhair mumkin hai

diloñ se mahv ye ho jaa.e ġhair mumkin hai

hai is ke nuur se raushan samāj kī duniyā

isī ke dam se hai ābād raaj kī duniyā

rahegā qā.em-o-dā.em mudām duniyā meñ

chalegā sikka-e-urdu tamām duniyā meñ

jo zinda rahne ko aa.e vo kaise ho barbād

'asad' lagāo ye na.ara ki urdu zindabād

ye pyari urdu ki jis ka nahin hai koi badal

hasin aisi hai jaise jamal-e-taj-mahal

har ek des-niwasi ne pai ye miras

wo ram ho ki karam singh ho ya ki mir-ghiyas

hai masjidon mein muqaddas pawitra mandir mein

har ek gali mein chalan aur guzar hai har ghar mein

wo jo ki bolte hain bhant bhant ki boli

to suniye un se bhi urdu jama ho jab Toli

kahin bhi jaiye urdu zarur paenge

samajhne bolne wale to mil hi jaenge

adab mein sher mein uncha maqam hai is ka

samaj ke sabhi shobon mein nam hai is ka

zawal is ko kabhi aae ghair mumkin hai

dilon se mahw ye ho jae ghair mumkin hai

hai is ke nur se raushan samaj ki duniya

isi ke dam se hai aabaad raj ki duniya

rahega qaem-o-daem mudam duniya mein

chalega sikka-e-urdu tamam duniya mein

jo zinda rahne ko aae wo kaise ho barbaad

'asad' lagao ye nara ki urdu zindabaad