اردو زباں

نطق کا اعجاز ہے اردو زباں

وقت کی آواز ہے اردو زباں

جس میں سر ہیں مختلف بھاشاؤں کے

وہ انوکھا ساز ہے اردو زباں

یہ زباں کے ساتھ ہے تہذیب بھی

قابل صد ناز ہے اردو زباں

مائل پرواز ہے اس کا ادب

منزل پرواز ہے اردو زباں

قومی یکجہتی سے جو پیدا ہوئی

وہ حسیں آغاز ہے اردو زباں

گیتا اور قرآں کی تفسیریں لیے

مذہبوں کا راز ہے اردو زبان

ہندو مسلم سکھ عیسائی کوئی ہو

سب کی ہی دم ساز ہے اردو زباں

اس کا دشمن دشمن امن و اماں

پریم کا انداز ہے اردو زباں

سب زبانوں پر چڑھی ہے موجؔ یہ

اس لیے ممتاز ہے اردو زباں