اردو

ضو فشاں تو رہے اے شمع زبان اردو

تیرا ہر ذرہ چمک کر مہ کامل ہو جائے

بول بالا ہو ترا ملک کے ہر گوشے میں

تیری لو زیب دہ انجمن دل ہو جائے

تیری ہر سطر بنے زلف حسینان جہاں

اک زمانہ ترا پابند سلاسل ہو جائے

جان دے حسن فصاحت پہ مسیحا نفسی

سامری بھی ترے اعجاز کا قائل ہو جائے

تیرے ہر لفظ میں ہو درد محبت کی تڑپ

ہر سخن شرح بیان خلش دل ہو جائے

ہو گیا میں ترے پروانوں کا ہر سال ہجوم

روز افزوں ترا ہنگامۂ محفل ہو جائے

ہو کچھ اس طرح گل افشانیٔ ارباب سخن

جس سے پامالیٔ گلبانگ عنادل ہو جائے

مئے گل رنگ شفق سے رہے رنگیں ترا جام

تیری ہر بزم ادب مے کدۂ دل ہو جائے

حضرت نوح کا اٹھتا رہے طوفاں یوں ہی

غرق سیلاب سخن دامن ساحل ہو جائے

ہر نو آموز صلہ پائے تری خدمت کا

ہر مہ نو ترے صدقے مہ کامل ہو جائے

زہے تقدیر زہے بخت کہ ناچیز سریرؔ

ترے خدام کی فہرست میں شامل ہو جائے