urdu

zindagī bhes badal kar jahāñ fan bantī hai

'mīr'-o-'ġhālib' kā vo andāz-e-bayāñ hai urdu

kabhī kartī hai sitāroñ se bhī aage manzil

chashm-e-iqbāl se goyā nigarāñ hai urdu

saath inshā ke kabhī hañstī hai dil khol ke vo

bahr-e-fānī kabhī masrūf fuġhāñ hai urdu

hāsil-e-bazm hai aur bazm ko taḌpātī hai

jān-e-mai-ḳhāna hai maiḳhāna-e-jāñ hai urdu

gaah parvāne kī mayyat pe khaḌī miltī hai

sūrat-e-sham.a jahāñ girya-kunāñ hai urdu

gaah ḳhushiyoñ ke chaman-zār meñ jā bastī hai

mausam-e-gul kī jahāñ rūh-e-ravāñ hai urdu

mahv-e-gul-gasht jahāñ hūr-e-bahishtī mil jaa.e

qābil-e-rashk vo gulzār-e-jināñ hai urdu

har ġhazal kūcha-e-jānāñ se ziyāda pyārī

har nazar sher hai tasvīr-e-butān-e-urdu

har na.ī nazm na.e moḌ pe le jaatī hai

rūh-e-imroz hai fardā kā nishāñ hai urdu

dhul ga.ī kausar-o-tasnīm ke paanī se magar

jannat-e-arz kī mazlūm zabāñ hai urdu

bāġhbāñ mujh ko ijāzat ho to ik baat kahūñ

naġhma bulbul kā hai phūloñ kī zabāñ hai urdu

milte haiñ is se hazāroñ hameñ tahzīb ke daras

is qadar zehn pe kyuuñ tere garāñ hai urdu

ab bhī chhā jaatī hai har ruuh pe mastī ban kar

is ḳharābī meñ bhī afsūn-e-javāñ hai urdu

zindagi bhes badal kar jahan fan banti hai

'mir'-o-'ghaalib' ka wo andaz-e-bayan hai urdu

kabhi karti hai sitaron se bhi aage manzil

chashm-e-iqbaal se goya nigaran hai urdu

sath insha ke kabhi hansti hai dil khol ke wo

bahr-e-fani kabhi masruf fughan hai urdu

hasil-e-bazm hai aur bazm ko taDpati hai

jaan-e-mai-KHana hai maiKHana-e-jaan hai urdu

gah parwane ki mayyat pe khaDi milti hai

surat-e-shama jahan girya-kunan hai urdu

gah KHushiyon ke chaman-zar mein ja basti hai

mausam-e-gul ki jahan ruh-e-rawan hai urdu

mahw-e-gul-gasht jahan hur-e-bahishti mil jae

qabil-e-rashk wo gulzar-e-jinan hai urdu

har ghazal kucha-e-jaanan se ziyaada pyari

har nazar sher hai taswir-e-butan-e-urdu

har nai nazm nae moD pe le jati hai

ruh-e-imroz hai farda ka nishan hai urdu

dhul gai kausar-o-tasnim ke pani se magar

jannat-e-arz ki mazlum zaban hai urdu

baghban mujh ko ijazat ho to ek baat kahun

naghma bulbul ka hai phulon ki zaban hai urdu

milte hain is se hazaron hamein tahzib ke daras

is qadar zehn pe kyun tere garan hai urdu

ab bhi chha jati hai har ruh pe masti ban kar

is KHarabi mein bhi afsun-e-jawan hai urdu