urus-ul-bilad

ek jazīra zamīñ ke siine par

hai jo ābād raushnī se hai

jis kī saḌkoñ pe raat der talak

zindagī dauḌtī hai bhāgtī hai

zindagī raat raat jāgtī hai

chā.e-ḳhānoñ pe shab-guzāroñ ke

qahqahe gūñjte hī rahte haiñ

is kī shāmeñ hasīn hotī haiñ

is maqām-e-hasīn ke baasī

chāshnī hai zabān meñ jin kī

pāsbāñ ye amiir ḳhusrau ke

'mīr'-o-'ġhālib' ke rāzdān-e-suḳhan

vārisān-e-zabān-e-urdu haiñ

gholte haiñ miThās bātoñ se

apnā lahja hasīn rakhte haiñ

ek tahzīb hai saqāfat hai

is ke khānoñ kī apnī lazzat hai

aur phir husn kī tamāzat hai

dekhne vaale dekhte haiñ kahīñ

is ke sāhil pe raunaq-e-duniyā

kheltī hañstī ġhul machātī huī

man-chale hañste muskurāte hue

zindagī kī ġhazal sunāte hue

raunaqoñ ke asiir rahte haiñ

jis ko kahte the log kolāchi

ab vo sāhil kināre bastā shahr

jaanā jaatā hai shahr-e-qā.id se

log jis ko karāchi kahte haiñ

ek jazira zamin ke sine par

hai jo aabaad raushni se hai

jis ki saDkon pe raat der talak

zindagi dauDti hai bhagti hai

zindagi raat raat jagti hai

chae-KHanon pe shab-guzaron ke

qahqahe gunjte hi rahte hain

is ki shamen hasin hoti hain

is maqam-e-hasin ke basi

chashni hai zaban mein jin ki

pasban ye amir KHusrau ke

'mir'-o-'ghaalib' ke raazdan-e-suKHan

warisan-e-zaban-e-urdu hain

gholte hain miThas baaton se

apna lahja hasin rakhte hain

ek tahzib hai saqafat hai

is ke khanon ki apni lazzat hai

aur phir husn ki tamazat hai

dekhne wale dekhte hain kahin

is ke sahil pe raunaq-e-duniya

khelti hansti ghul machati hui

man-chale hanste muskuraate hue

zindagi ki ghazal sunate hue

raunaqon ke asir rahte hain

jis ko kahte the log kolachi

ab wo sahil kinare basta shahr

jaana jata hai shahr-e-qaid se

log jis ko karachi kahte hain