us ka dukh

vo muntazir thī

hazār sadiyoñ se muntazir thī

maiñ ek zarra

havā ke rath par savār, hañstā huā

ḳhalāoñ meñ gungunātā

hazār-hā saal ke sabhī hādsoñ kī garmī ragoñ meñ bhar kar

ghane daraḳhtoñ ke narm sāyoñ meñ aa ke utrā

vo muntazir thī

mujhe thakan se niDhāl dekhā

to khilkhilā kar lipaT ga.ī mujh se be-tahāshā

mire badan ko vo rañg baḳhshā

ki ḳhushbuoñ meñ nahā.īñ pagDañDiyāñ suhānī

vo nuur mujh ko atā kiyā

jagmagā ga.iiñ jañgaloñ kī tanhā.iyāñ purānī

hazār sadiyāñ guzar chukī haiñ

maiñ aaj ḳhud ko Dubo chukā huuñ hayāt ke

ḳhair o shar meñ yaksar

magar vo ab bhī pukārtī hai mire lahū ko

mire janam kī vo muntazir hai

hazār sadiyoñ se muntazir hai

wo muntazir thi

hazar sadiyon se muntazir thi

main ek zarra

hawa ke rath par sawar, hansta hua

KHalaon mein gungunata

hazar-ha sal ke sabhi hadson ki garmi ragon mein bhar kar

ghane daraKHton ke narm sayon mein aa ke utra

wo muntazir thi

mujhe thakan se niDhaal dekha

to khilkhila kar lipaT gai mujh se be-tahasha

mere badan ko wo rang baKHsha

ki KHushbuon mein nahain pagDanDiyan suhani

wo nur mujh ko ata kiya

jagmaga gain jangalon ki tanhaiyan purani

hazar sadiyan guzar chuki hain

main aaj KHud ko Dubo chuka hun hayat ke

KHair o shar mein yaksar

magar wo ab bhi pukarti hai mere lahu ko

mere janam ki wo muntazir hai

hazar sadiyon se muntazir hai