uske dushman

sahar huī to kisī ne uTh kar

lahū meñ tar ek surḳh buuTī

baḌī karāhat se

āsmāñ ke farāḳh āñgan meñ pheñk dī aur

tavīl matlī kī jān-levā sī kaifiyat se najāt paa.ī

magar falak ke farāḳh āñgan meñ

bādaloñ ke safed sag us ke muntazir the

jhapaT paḌe us lahū meñ tar dil ke lothaḌe par

jhapaT paḌe ek dūsre par

zamīn ke logoñ ne der tak ye laḌā.ī dekhī

safed kuttoñ ke surḳh jabḌe

lahū meñ tar ek laal TukḌā darīda sūraj

harīs girāte bādaloñ kā tavīl gahrā muhīb dukhḌā

mirī zamīñ bhī to gosht kā lothḌā thī jis ko

kisī ne andhe ḳhalā meñ pheñkā

magar na koī bhī us pe jhapTā

tab us ke andar se aa.e bāhar

usī ke dushman

usī kī bū par

hazāroñ ḳhuñḳhār tund kutte

harīs jabḌe

aur ab darīda zamīn saarī

Tapakte girte lahū ke qatroñ meñ ris rahī hai

ḳhud apne ḳhuñḳhār tund bachchoñ ke tez jabḌoñ meñ pis rahī hai

sahar hui to kisi ne uTh kar

lahu mein tar ek surKH buTi

baDi karahat se

aasman ke faraKH aangan mein phenk di aur

tawil matli ki jaan-lewa si kaifiyat se najat pai

magar falak ke faraKH aangan mein

baadalon ke safed sag us ke muntazir the

jhapaT paDe us lahu mein tar dil ke lothaDe par

jhapaT paDe ek dusre par

zamin ke logon ne der tak ye laDai dekhi

safed kutton ke surKH jabDe

lahu mein tar ek lal TukDa darida suraj

haris giraate baadalon ka tawil gahra muhib dukhDa

meri zamin bhi to gosht ka lothDa thi jis ko

kisi ne andhe KHala mein phenka

magar na koi bhi us pe jhapTa

tab us ke andar se aae bahar

usi ke dushman

usi ki bu par

hazaron KHunKHar tund kutte

haris jabDe

aur ab darida zamin sari

Tapakte girte lahu ke qatron mein ris rahi hai

KHud apne KHunKHar tund bachchon ke tez jabDon mein pis rahi hai