uske nam jise tariki nigal chuki

kaun paḌh saktā hai bātin ko

kaun chhū saktā hai āñkhoñ kī vīrānī ko

kaun dīvāroñ pe martī dhuup ko apne andar utaar saktā hai

jab havās koḌh-zada ho jaa.eñ

tab judā.ī ke zaḳhm se man ajnabī ho jaatā hai

vo merī āvāz ke lams se bahut duur hai

vo kaun sī banjar zamīn hai

jahāñ mere kisī ehsās kisī kaifiyat kī rasā.ī nahīñ hotī

be-tahāshā chīḳh mere andar jam.a hai

mohabbat kis kis tarah se mazāq bantī hai

ḳhudā ne har baar mere dil ko āzmāyā

ye merī ḳhud-kalāmī hai jo mujhe zinda rakhe hue hai

varna mujhe mārne vāloñ ne

merā amn ḳhālī kar diyā thā

us ne ḳhāmoshī ko apnā hathiyār banāyā

aur us hathiyār se

fariyād karne vaale kī ruuh ko zaḳhmī kar diyā

vo jāntā hai

tashaddud kis kis tarah se kiyā jā saktā hai

vo be-zār ho gayā us āvāz se

vo be-zār ho gayā us āvāz se

jo rok rahī thī use añdheroñ meñ jaane se

afsos

vo kho gayā

use tārīkī nigal chukī hai

kaun paDh sakta hai baatin ko

kaun chhu sakta hai aankhon ki virani ko

kaun diwaron pe marti dhup ko apne andar utar sakta hai

jab hawas koDh-zada ho jaen

tab judai ke zaKHm se man ajnabi ho jata hai

wo meri aawaz ke lams se bahut dur hai

wo kaun si banjar zamin hai

jahan mere kisi ehsas kisi kaifiyat ki rasai nahin hoti

be-tahasha chiKH mere andar jama hai

mohabbat kis kis tarah se mazaq banti hai

KHuda ne har bar mere dil ko aazmaya

ye meri KHud-kalami hai jo mujhe zinda rakhe hue hai

warna mujhe marne walon ne

mera amn KHali kar diya tha

us ne KHamoshi ko apna hathiyar banaya

aur us hathiyar se

fariyaad karne wale ki ruh ko zaKHmi kar diya

wo jaanta hai

tashaddud kis kis tarah se kiya ja sakta hai

wo be-zar ho gaya us aawaz se

wo be-zar ho gaya us aawaz se

jo rok rahi thi use andheron mein jaane se

afsos

wo kho gaya

use tariki nigal chuki hai